اونٹاریو اور کیوبیک کے کچھ حصوں میں برفانی طوفان دوسرے دن بھی جاری، مزید برفباری کا امکان۔اتوار کی صبح اونٹاریو اور کیوبیک کے کچھ حصوں میں برفانی طوفان شدت اختیار کر رہا ہے، جب کہ مزید شدید برفباری کی توقع ہے۔
انویئرنمنٹ کینیڈا نے ہفتے کے روز جنوبی اونٹاریو اور کیوبیک کے لیے برفانی طوفان کی وارننگ جاری کی، جس میں ٹورنٹو میں 15 سے 25 سینٹی میٹر اضافی برفباری کی پیش گوئی کی گئی ہے، جب کہ جنوب مغربی اونٹاریو کے کچھ علاقوں میں بھی اسی طرح کے حالات متوقع ہیں۔
جنوب مشرقی اونٹاریو میں بھی یہی صورتِ حال رہے گی، جہاں اوٹاوا کے علاقے میں مزید 20 سے 30 سینٹی میٹر برف گرنے کا امکان ہے۔محکمے کے مطابق، حالات تیزی سے خراب ہو سکتے ہیں اور تیزی سے جمنے والی برف بعض علاقوں میں سفر کو خطرناک بنا سکتی ہے۔
ایسٹرن ریجن اونٹاریو پروانشل پولیس (OPP) نے لوگوں سے اپیل کی ہے کہ وہ سفر سے گریز کریں کیونکہ حدِ نگاہ مزید خراب ہو رہی ہے۔ پولیس کے مطابق، اتوار کی صبح ہائی وے 401 پر ایک گاڑی الٹنے کا واقعہ پیش آیا، تاہم خوش قسمتی سے کوئی جانی نقصان نہیں ہوا۔ یہ اطلاع پولیس نے سوشل میڈیا پلیٹ فارم X پر دی۔
دوسری جانب، OPP سنٹرل ریجن نے ٹورنٹو کے مشرق میں نارتھمبرلینڈ کاؤنٹی میں ہائی وے کے حالات مزید خراب ہونے کے پیش نظر مسافروں کو ہنگامی متبادل راستے اختیار کرنے کی ہدایت کی ہے۔اتوار کی صبح شدید برفباری کے باعث ٹورنٹو پیئرسن انٹرنیشنل ایئرپورٹ پر درجنوں پروازیں منسوخ یا تاخیر کا شکار ہوئیں۔
ٹورنٹو پیئرسن انٹرنیشنل ایئرپورٹ نے X پر بتایا کہ اتوار صبح 8 بجے تک ایئرپورٹ پر 12 سینٹی میٹر سے زیادہ برف جمع ہو چکی تھی اور دن کے اختتام تک مزید 15 سینٹی میٹر برف پڑنے کی توقع ہے۔بحریاتی صوبوں (Maritime provinces) کے کچھ حصوں میں بھی تیز ہوائیں اور برفباری متوقع ہے، جبکہ کچھ علاقوں میں تیز ہوائیں پیر تک برقرار رہ سکتی ہیں۔
