ممبئی(ایجنسیاں) بولی وڈ کے مشہور اداکار دھرمیندر 89 برس کی عمر میں انتقال کر گئے ہیں۔ فلم فئیر کے مطابق وہ ممبئی میں زیرِ علاج تھے اور سانس کی پیچیدگیوں کے باعث ہسپتال میں داخل تھے۔
چھ دہائیوں پر محیط اپنے کیریئر میں دھرمیندر نے 300 سے زائد فلموں میں کام کیا، جن میں ’شعلے‘، ’سیتا اور گیتا‘ اور ’چپکے چپکے‘ جیسی آئیکونک فلمیں شامل ہیں۔ ان کی پہلی فلم 1960 میں ریلیز ہوئی تھی، اور ان کی آخری فلم ’اکیس‘ دسمبر میں ریلیز ہونے والی ہے۔
اپنے کیریئر کے دوران، دھرمیندر کو فلم فئیر کی جانب سے لائف ٹائم ایچیومنٹ ایوارڈ، نیو جرسی کی جانب سے اعزاز، اور بھارت کا تیسرا سب سے بڑا شہری اعزاز پدما بھوشن بھی دیا گیا تھا۔وہ سیاست میں بھی سرگرم رہے اور 2004 میں بیكانیر سے پارلیمنٹ کے رکن منتخب ہوئے۔
رواں ماہ کے آغاز میں ایک بار ان کی وفات کی افواہیں پھیلیں، جنہیں اہل خانہ نے مسترد کر دیا تھا، اور انہیں ہسپتال سے ڈسچارج بھی کیا گیا تھا۔ مگر اب افسوسناک طور پر ان کے انتقال کی خبر سچ ثابت ہوئی۔اداکاروں اور شوبز شخصیات نے دھرمیندر کی وفات پر گہری تعزیت کا اظہار کیا ہے:
کرن جوہر نے اپنے انسٹاگرام پیغام میں کہا کہ دھرمیندر ایک عظیم میگا اسٹار تھے اور بھارتی سنیما کے لیجنڈ رہیں گے۔بومن ایرانی نے انہیں لاکھوں دلوں کو خوشی دینے والے شکرگزار اداکار قرار دیا۔ڈیزائنر منیش ملہوترا کا کہنا ہے کہ ان کی موت بھارتی سنیما کا بڑا نقصان ہے۔کاجول نے لکھا کہ ایک اچھا انسان اس دنیا سے گیا ہے، اور ان کے جانے سے دنیا غریب ہو گئی ہے۔فرحان اختر نے ان کی محبت، مہربانی اور شگفتگی کو خراج تحسین پیش کیا اور کہا کہ فلمی دنیا ایک بڑا ستارہ کھو چکی ہے۔
بھارتی میڈیا میں وڈیوز سامنے آئی ہیں جن میں دھرمیندر کی اہلیہ ہیما مالنی اور بیٹی ایشا دیول کو ان کی آخری رسومات کے لیے کریمیٹریم جاتے ہوئے دکھایا گیا ہے، جہاں سخت سیکورٹی کے انتظامات کیے گئے تھے۔ علاوہ ازیں، امیتابھ بچن، ابھیشیک بچن اور عامر خان جیسی شخصیات بھی کریمیٹریم پہنچتے ہوئے دیکھی گئیں۔
