راولپنڈی(آئی ایس پی آر)بلوچستان کے ضلع آواران میں سیکیورٹی فورسز نے خفیہ اطلاعات پر کارروائی کرتے ہوئے بھارتی سرپرستی میں چلنے والی دہشت گرد تنظیم “فتنہ الہندوستان” کے تین دہشت گردوں کو ہلاک کر دیا۔ فائرنگ کے تبادلے میں میجر سید رب نواز طارق نے جامِ شہادت نوش کیا۔ علاقے میں کلیئرنس آپریشن جاری ہے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے آج ضلع آواران، بلوچستان میں خفیہ معلومات کی بنیاد پر دہشت گردوں کے خلاف کارروائی کی۔ یہ آپریشن بھارتی پراکسی نیٹ ورک “فتنہ الہندوستان” سے وابستہ دہشت گردوں کی موجودگی کی اطلاع پر کیا گیا تھا۔
سیکیورٹی فورسز نے مؤثر حکمت عملی کے تحت دہشت گردوں کے ٹھکانے کو نشانہ بنایا، جس کے نتیجے میں تین دہشت گرد ہلاک کر دیے گئے۔ تاہم اس دوران شدید فائرنگ کے تبادلے میں پاک فوج کے میجر سید رب نواز طارق، جن کی عمر 34 سال تھی اور ان کا تعلق ضلع مظفرآباد سے تھا، نے بہادری سے قیادت کرتے ہوئے اپنی جان مادرِ وطن پر قربان کر دی۔
آئی ایس پی آر کے مطابق علاقے میں مزید دہشت گردوں کی تلاش اور ممکنہ خطرات کے خاتمے کے لیے کلیئرنس آپریشن جاری ہے۔
فوجی ترجمان کے مطابق”پاکستان کی سیکیورٹی فورسز بھارتی سرپرستی میں ہونے والی دہشت گردی کی لعنت کو جڑ سے اکھاڑنے کے لیے پرعزم ہیں، اور ہمارے بہادر جوانوں کی قربانیاں ہمارے عزم کو مزید پختہ کرتی ہیں۔”
