ابتدائی نتائج کے مطابق بھارتیہ جنتا پارٹی اور اتحادی ریاستی اسمبلی میں واضح اکثریت کی جانب
نئی دہلی(ایجنسیاں)بھارتی وزیراعظم نریندر مودی نے ملک کی غریب ترین ریاست بہار میں ہونے والے اہم مقامی الیکشن میں اپنی پارٹی اور اس کے اتحادیوں کی ممکنہ ’زبردست‘ کامیابی کو سراہا ہے۔130 ملین آبادی والی مشرقی ریاست کو بڑے پیمانے پر ایک امتحان سمجھا جا رہا تھا کہ آیا مودی نئی دہلی کی تیزی سے ترقی کرتی معیشت کو ملک کے غریب ترین شہریوں کے فائدے میں بدلنے کی صلاحیت رکھتے ہیں یا نہیں۔
الیکشن کمیشن کے مطابق ابتدائی نتائج اور اندازوں سے مودی کی ہندو قوم پرست جماعت بھارتیہ جنتا پارٹی (بی جے پی) اور اس کے اتحادیوں کو ریاستی اسمبلی میں واضح اکثریت ملتی دکھائی دے رہی ہے۔مودی نے اس جیت کو “اچھی حکمرانی کی فتح”قرار دیا اور سوشل میڈیا پر کہا”یہ گونج دار عوامی مینڈیٹ ہمیں لوگوں کی خدمت کرنے اور بہار کیلئےنئے عزم کے ساتھ کام کرنے کا اختیار دیتا ہے۔”
بہار واحد ریاست ہے جہاں ہندی بولنے والے شمال میں مودی کی پارٹی نے کبھی تنہا حکومت نہیں کی۔ اس بار بھی بی جے پی کیلئےاکیلے اکثریت حاصل کرنا ممکن نظر نہیں آتا، مگر وہ اپنے اتحادی جنتا دل (یونائیٹڈ) سے آگے بڑھ کر سب سے بڑی جماعت بن کر ابھرنے کی راہ پر ہے۔
الیکشن کمیشن کے اعداد و شمار کے مطابق چھوٹے اتحادیوں کے ساتھ مل کر بی جے پی اور اتحادی کم از کم تین چوتھائی نشستیں حاصل کرنے کے قریب ہیں۔ ماہرین کا کہنا ہے کہ یہ انتخابی نتیجہ آئندہ سال دیگر اہم ریاستی انتخابات سے قبل مودی اور ان کی جماعت کیلئےتقویت کا باعث بن سکتا ہے۔
یہ جیت بھارتی وزیراعظم کی داخلی اور خارجی پالیسی کی کئی مشکل آزمائشوں جن میں پاکستان کے ساتھ مسلح تنازع اور امریکا کی جانب سے سخت تجارتی محصولات شامل ہیں کے بعد ان کی سیاسی پوزیشن کو مزید مضبوط بنانے کی توقع رکھتی ہے۔
