لندن(نمائندہ خصوصی)وزیراعظم کینیڈا مارک کارنی نے برطانیہ اور یورپ کے چار روزہ دورے کا اختتام کیا، جس کے دوران انہوں نے حکومتی سربراہان، عالمی سرمایہ کاری کمپنیوں اور تجارتی رہنماؤں سے ملاقاتیں کیں۔ ان ملاقاتوں کا مقصد کینیڈائی کاروباروں اور کارکنوں کیلئےنئی معاشی راہیں کھولنا اور کینیڈا کے عالمی تجارتی تعلقات کو مزید گہرا کرنا تھا۔
وزیراعظم نے کہا کہ دنیا بھر میں بڑھتی ہوئی بے یقینی کے تناظر میں کینیڈا کو اپنی بین الاقوامی شراکت داریوں کو متنوع اور مضبوط بنانا ہوگا تاکہ ملکی معیشت مزید لچکدار ہو اور طویل المدتی خوشحالی کو یقینی بنایا جا سکے۔
دورے کے دوران وزیراعظم کارنی نے برطانیہ کے وزیراعظم کیئر اسٹارمر، آسٹریلیا کے وزیراعظم، اسپین کے وزیراعظم اور آئس لینڈ کے وزیراعظم سے علیحدہ علیحدہ ملاقاتیں کیں۔ ان ملاقاتوں میں باہمی تجارتی تعلقات کو وسعت دینے، عالمی سلامتی امور جیسے یوکرین اور مشرقِ وسطیٰ کے بحرانوں پر تعاون بڑھانے، اور ماحولیاتی تبدیلی کے چیلنجز سے نمٹنے کے اقدامات پر گفتگو کی گئی۔
وزیراعظم نے لندن میں ایشیائی، یورپی اور افریقی سرمایہ کاری کمپنیوں کے نمائندوں سے بھی ملاقاتیں کیں۔ ان کا مقصد کینیڈا میں جاری بڑے انفراسٹرکچر منصوبوں کو اجاگر کرنا اور عالمی سرمایہ کاروں کو کینیڈا میں سرمایہ کاری کے نئے مواقع کے بارے میں آگاہ کرنا تھا۔
وزیراعظم کارنی نے کہا “کینیڈا کے پاس وہ سب کچھ ہے جو دنیا کو درکار ہے، اور وہ اقدار ہیں جنہیں دنیا اپنانا چاہتی ہے۔ جب ہم اپنے شراکت داروں کے ساتھ نئے اصولوں پر مبنی عالمی نظام تعمیر کریں گے تو کینیڈا اس میں کامیابی کے لیے بہترین پوزیشن میں ہوگا۔ ہم اپنی بین الاقوامی شراکت داریاں متنوع کریں گے، قابل اعتماد اتحادیوں کے ساتھ تعلقات مزید مضبوط کریں گے اور مل کر کینیڈائی کارکنوں اور کاروباروں کے لیے لاکھوں مواقع پیدا کریں گے۔”
وزیراعظم نے مزید کہا کہ یہ بات چیت صرف مخصوص منصوبوں پر نہیں بلکہ مجموعی سرمایہ کاری کے ماحول، کینیڈا کی عالمی ساکھ اور مستقبل کے تعاون کے امکانات پر مرکوز تھی۔
یہ دورہ وزیراعظم کارنی کے رواں سال کے غیر ملکی دوروں کی سلسلہ وار کوششوں کا حصہ ہے، جن کا مقصد کینیڈا کی معیشت کو مضبوط بنانا، سلامتی کو یقینی بنانا اور عالمی سطح پر کینیڈا کے کردار کو مزید نمایاں کرنا ہے۔
