برامپٹن، اونٹاریو(نمائندہ خصوصی) ہاکی کے شائقین کیلئےایک سنسنی خیز مقابلے کی تیاریاں عروج پر ہیں جہاں کینیڈین انڈین اور کینیڈین پاکستانی ماسٹرز ہاکی ٹیمیں ایک یادگار ٹیسٹ سیریز کیلئےمیدان میں اترنے کو تیار ہیں۔ یہ مقابلہ 20 جولائی کو دوپہر 12:30 بجے کاسی کیمبل کمیونٹی سینٹر، 1050 سینڈل ووڈ پارک وے ویسٹ، بریمپٹن، اونٹاریو، L7A 0K9، کینیڈا میں منعقد ہوگا۔
“چیمپئنز دوبارہ آمنے سامنے!” کے نعرے کے تحت منعقد ہونے والی یہ سیریز نہ صرف ہاکی کے بہترین کھیل کا مظاہرہ کرے گی بلکہ دونوں کمیونٹیز کے درمیان دوستانہ مقابلے اور کھیلوں کے ذریعے یکجہتی کو بھی فروغ دے گی۔ یہ میچ دونوں ٹیموں کے تجربہ کار کھلاڑیوں کو اپنی صلاحیتوں کا مظاہرہ کرنے اور ماضی کی شاندار کارکردگی کو دہرانے کا موقع فراہم کرے گا۔
اس ایونٹ کے منتظمین نے تمام کمیونٹیز سے تعلق رکھنے والے ہاکی کے شائقین کو دعوت دی ہے کہ وہ بڑی تعداد میں شرکت کریں اور اس دلچسپ مقابلے کا حصہ بنیں۔ یہ نہ صرف ہاکی کا ایک بہترین شو ہو گا بلکہ کمیونٹی کے باہمی تعلقات کو مضبوط بنانے کا بھی ایک بہترین موقع ہو گا۔
اس ایونٹ کے بارے میں مزید معلومات کیلئے براہ کرم دیے گئے مقام پر 20 جولائی کو تشریف لائیں۔
