ملک کے مختلف شہروں سے جشن عید میلا دالنبی ﷺ کے مرکزی جلوس برآمد ہوگئے ہیں۔کراچی میں آج 3 مرکزی جلوس نکالے جا رہے ہیں، تینوں جلوس نمائش پہنچیں گے۔کراچی میں جشن عید میلاد النبیﷺ کے سلسلے میں سنی تحریک کی ریلی کی قیادت شاداب رضا نقشبندی کر رہے ہیں۔ریلی لیاقت آباد ڈاک خانے سے شروع ہو کر کھارادر چھٹن شاہ کے مزار پر ختم ہو گی۔راولپنڈی میں مرکزی جلوس کے روٹ کی طرف آنے والے راستوں کو سیل کر دیا گیا ہے جہاں پر ضلعی انتظامیہ، پولیس اور سول ڈیفینس کے اہلکار بڑی تعداد میں تعینات ہیں۔ملتان میں 12 ربیع الاول کا مرکزی جلوس قلعہ کہنہ قاسم سے برآمد ہو گیا ہے۔پولیس کے مطابق دو ہزار سے زائد پولیس اہلکار سیکیورٹی کے فرائض سرانجام دے رہے ہیں۔فیصل آباد میں 12 ربیع الاول کے سلسلہ میں ضلع بھر میں 143 جلوس اور 20 محافل منعقد کی جائیں گی۔پولیس کا کہنا ہے کہ جلوسوں اور محفل کی سیکیورٹی کے لیے 4 ہزار 561 پولیس اہلکار ڈیوٹی انجام دیں گے، مرکزی جلوسوں کی سی سی ٹی وی اور ڈرون کیمروں سے مانیٹرنگ کی جائے گی۔حیدرآباد میں 12 ربیع الاول کا جلوس بعد نماز ظہر برآمد ہو کر کوہ نور چوک پر اختتام پذیر ہو گا۔اس حوالے سے ایس ایس پی کا کہنا ہے کہ جلوسوں اور ریلیوں کے لیے 4 ہزار سے زائد پولیس اہلکار سیکیورٹی پر تعینات ہیں۔سکھر میں 12 ربیع الاول کا مرکزی جلوس مفتی محمد ابراہیم قادری کی قیادت میں برآمد ہو گیا۔پاکپتن میں 12ربیع الاول کا جلوس غلہ منڈی سے برآمد ہو گیا ہے۔جلوس کی قیادت مرکزی میلاد کمیٹی کے عیدیدار، سیاسی و مذہبی رہنما کر رہے ہیں.اوکاڑہ میں 12ربیع الاول کی مناسبت سے 69 جلوس بر آمد ہو گئے جن میں لوگ بڑی تعداد میں شریک ہیں۔12ربیع الاول کے اجتماعات کی سیکیورٹی کے لیے کوئٹہ شہر میں موبائل فون سروس معطل ہے۔راولپنڈی میں بھی مرکزی جلوس اور ملحقہ علاقوں میں موبائل فون سروس معطل کی گئی ہے۔
