نیویارک (انادولو) — نیویارک کے ڈیموکریٹک میئر امیدوار زہران ممدانی نے نیویارک پولیس ڈیپارٹمنٹ سے 2020 میں جارج فلوئیڈ احتجاج کے دوران کیے گئے اپنے تبصروں پر معافی مانگ لی ہے۔
ممدانی نے فاکس نیوز کو دیے گئے انٹرویو میں کہا کہ “میں نے اس وقت جو زبان استعمال کی تھی اس پر معذرت خواہ ہوں۔ میں نیویارک پولیس کے ساتھ مل کر عوامی تحفظ کے لیے کام کرنا چاہتا ہوں، کیونکہ ہم افسران سے اب صرف سنگین جرائم نہیں بلکہ ذہنی صحت کے بحران اور بے گھر افراد کے مسائل پر بھی توجہ دینے کی توقع رکھتے ہیں۔”
انہوں نے مزید کہا کہ پولیسنگ کے بارے میں ان کے خیالات وقت کے ساتھ بدل گئے ہیں اور ان کی توجہ کا ایک اہم حصہ یہ ہے کہ انصاف فراہم کرنے کے لیے تحفظ بھی ضروری ہے۔ انہوں نے واضح کیا کہ ان کا مقصد سیاہ فام اور براؤن نیویارکرز کی نمائندگی کرنا ہے جو پولیس تشدد کا شکار رہے، اور اپنے حلقے میں رہنے والے مسلمان نیویارکرز کی آواز بننا ہے جو مذہب کی بنیاد پر نگرانی کا سامنا کرتے ہیں۔
خیال رہے کہ جون 2020 میں ممدانی نے سوشل میڈیا پر نیویارک پولیس ڈیپارٹمنٹ پر نسل پرستی، ہم جنس مخالف رویہ اور عوامی تحفظ کے لیے خطرہ ہونے کے الزامات لگائے تھے، اور ان کے فنڈز میں کٹوتی کی وکالت کی تھی۔ یہ بیان جارج فلوئیڈ کی ہلاکت کے بعد سامنے آیا تھا، جس نے دنیا بھر میں نسل پرستی اور پولیس تشدد کے خلاف مظاہروں کو جنم دیا۔
