نیو جرسی، امریکا(سپورٹس ڈیسک)فیفا کے پہلے کلب ورلڈ کپ فائنل میں انگلش کلب چیلسی نے فرانسیسی چیمپیئن پی ایس جی کو 0-3 سے شکست دے کر تاریخی فتح حاصل کر لی۔ میچ امریکی ریاست نیو جرسی کے میٹ لائف اسٹیڈیم میں کھیلا گیا، جس میں کول پالمر نے 2 اور پیڈرو نے ایک گول اسکور کیا۔
تاریخ میں پہلی بار منعقد ہونے والے فیفا کلب ورلڈ کپ کے فائنل میں انگلش فٹبال کلب چیلسی نے شاندار کارکردگی کا مظاہرہ کرتے ہوئے پیرس سینٹ جرمین (پی ایس جی) کو 0-3 سے شکست دی۔ یہ ٹورنامنٹ 32 ٹیموں پر مشتمل تھا، جس کا فائنل امریکا کے میٹ لائف اسٹیڈیم، نیو جرسی میں کھیلا گیا۔
میچ کے پہلے ہاف میں کول پالمر نے دو خوبصورت گول داغے، جبکہ پیڈرو نے ایک اور گول اسکور کر کے چیلسی کو فیصلہ کن برتری دلا دی۔ اگرچہ دوسرے ہاف کا آغاز انتظامی وجوہات کی بنا پر تاخیر کا شکار ہوا، تاہم باقی میچ میں کوئی ٹیم گول نہ کر سکی اور چیلسی نے 0-3 سے کامیابی حاصل کی۔
فائنل کی تقریب میں شرکت کے باعث امریکی صدر ڈونلڈ ٹرمپ مرکزِ توجہ بنے رہے۔ اسٹیڈیم میں ان کی آمد اور سخت سیکیورٹی سے تماشائیوں کو پریشانی کا سامنا رہا۔ فائنل سے قبل کولڈ پلے اور ڈوجا کیٹ سمیت فنکاروں کی پرفارمنس بھی منعقد ہوئی، جسے کچھ شائقین نے غیر ضروری قرار دیا۔
فائنل کے بعد ٹرافی تقسیم کی تقریب میں فیفا صدر گیانی انفینتینو کے ساتھ ٹرمپ بھی شریک ہوئے، تاہم انہوں نے ٹرافی پیش کرنے کے بعد بھی اسٹیج پر قیام جاری رکھا، جس پر چیلسی کے کھلاڑی اور آفیشلز ناخوش دکھائی دیے۔ کپتان جیمز ریس اور روبرٹ سینچیس نے ٹرمپ کو جانے کی درخواست کی، مگر ٹرمپ نے جواب دیا: “میں بھی آپ کے ساتھ جشن منا رہا ہوں”۔
کول پالمر بھی اس موقع پر ناپسندیدگی کا اظہار کرتے دکھائی دیے، جبکہ سوشل میڈیا پر صارفین نے اس عمل پر شدید تنقید کی اور کہا کہ “ٹرمپ نے چیلسی کے تاریخی لمحے کو چھین لیا۔”
واضح رہے کہ پی ایس جی اس سال شاندار کارکردگی دکھا چکی ہے اور دو ڈومیسٹک و ایک یو ای ایف اے چیمپیئنز لیگ ٹرافی جیت کر ٹریبل اپنے نام کیا۔ یہی وجہ تھی کہ اسے اس دہائی کی بہترین ٹیم قرار دیا جا رہا تھا۔
میچ کے اختتام پر کچھ کھلاڑیوں کے درمیان گرما گرمی بھی دیکھی گئی، جس پر پی ایس جی کے منیجر لوئس اینریکے نے مداخلت کی۔ بعد ازاں انہوں نے صحافیوں سے گفتگو میں چیلسی کو جیت کا مستحق قرار دیا اور کہا: “ہمیں بدنظمی سے اجتناب کرنا چاہیے تھا، چیلسی نے شاندار کھیل پیش کیا۔”
یاد رہے کہ فیفا نے اس ٹورنامنٹ میں ان ٹیموں کو مدعو کیا تھا جو 2021 سے 2023 کے دوران یورپی و عالمی سطح پر شاندار کارکردگی دکھا چکی تھیں۔ ٹورنامنٹ کے کامیاب انعقاد اور چیلسی کی فتح نے فٹبال کی دنیا میں ایک نیا باب رقم کر دیا ہے۔
