اوٹاوا (نامہ نگار) کینیڈا کی وزیرِ خارجہ انیتا آنند اور پاکستان کے نائب وزیرِ اعظم و وزیرِ خارجہ سینیٹر محمد اسحاق ڈار کے درمیان 30 اکتوبر کو ایک ٹیلی فونک گفتگو ہوئی، جس میں دونوں رہنماؤں نے دوطرفہ تعلقات کو مزید مضبوط بنانے کے عزم کا اظہار کیا۔
گفتگو میں دونوں ممالک کے درمیان معاشی اور تجارتی تعاون کے فروغ پر زور دیا گیا۔ فریقین نے اس بات پر اتفاق کیا کہ کینیڈین کینولا کی پاکستان کو برآمدات کو سہل بنایا جائے گا، کیونکہ پاکستان میں اس شعبے میں سرمایہ کاری کے وسیع مواقع موجود ہیں۔
وزرائے خارجہ نے غیرملکی سرمایہ کاری کے فروغ و تحفظ کے معاہدے (FIPA) کے پہلے مرحلے کی کامیاب تکمیل کا خیرمقدم کیا۔ یہ معاہدہ دونوں ممالک کے درمیان شفاف اور مستحکم سرمایہ کاری کے ماحول کے فروغ کے عزم کی عکاسی کرتا ہے۔
کینیڈا اور پاکستان نے توانائی کے تحفظ اور قیمتی معدنیات کے شعبوں میں بھی تعاون بڑھانے پر اتفاق کیا۔ دونوں رہنماؤں نے اس بات کو سراہا کہ کینیڈین کمپنیاں پاکستان کے معدنی وسائل کے فروغ اور قابلِ تجدید توانائی کے منصوبوں میں اہم کردار ادا کر سکتی ہیں۔
مزید برآں، وزرائے خارجہ نے آئندہ ہونے والے دوطرفہ مشاورتی اجلاس کے چھٹے دور پر بھی تبادلہ خیال کیا، جو دونوں ممالک کے مابین اشتراکِ عمل اور نئے تعاون کے امکانات کو آگے بڑھانے کیلئےایک اہم موقع ہوگا۔دونوں ممالک نے اس عزم کا اعادہ کیا کہ وہ عالمی و علاقائی سطح پر امن، خوشحالی اور جامع ترقی کے فروغ کیلئے مشترکہ طور پر کام کرتے رہیں گے۔
