آپریشن بنیان مرصوص کی کامیابی، وزیراعظم کا ہر 10 مئی کو یوم معرکہ حق منانے، شہدا پیکیج کا اعلان

اسلام آباد(نمائندہ خصوصی)آپریشن بنیان مرصوص کی شاندار کامیابی پر وزیراعظم شہباز شریف نے ہر سال 10 مئی کو یوم معرکہ حق منانے اور شہدا پیکیج کا اعلان کر دیا۔وزیر اعظم شہباز شریف کا ایک بیان میں کہنا تھا کہ یوم معرکہ حق ہر سال پورے ملک میں جوش و خروش سے منایا جائے۔

انہوں نے کہا کہ ہماری افواج نے ہمارا سر فخر سے بلند کیا، جمعہ کے دن یوم تشکر کے تسلسل میں خصوصی نوافل ادا کریں گے۔شہباز شریف نے معرکہ حق کے دوران شہید ہونے والوں کیلئےشہدا پیکیج کا اعلان کر دیا۔

پاک افواج کے شہداء کے ورثا کو رینک کے حساب ایک کروڑ روپے سے ایک کروڑ 80 لاکھ روپے رقم دی جائیگی، اسی طرح پاک افواج کے شہدا کے ورثاء کو گھر کی سہولت کیلئےرینک کے حساب سے ایک کروڑ 90 لاکھ روپے سے 4 کروڑ 20 لاکھ روپے دیے جائیں گے۔

اسی طرح پاک افواج کے شہدا کی ریٹائرمنٹ کی تاریخ تک ان کی مکمل تنخواہ بمعہ الاونسز جاری رہیں گی، پاک افواج کے شہدا کے بچوں کو گریجویشن تک مفت تعلیم دی جائیگی۔پیکیج کے مطابق پاک افواج کے ہر شہید کی ایک بیٹی کی شادی کیلئے10 لاکھ روپے کی میرج گرانٹ دی جائیگی ۔

وزیرِاعظم کا کہنا تھا کہ بھارتی حملے میں متاثر ہونے والے گھروں، شہید مساجد کی تعمیر وفاقی حکومت کریگی، شہدا کے بچوں کی کفالت حکومت کی ذمہ داری ہے ہم یہ فرض پورا کرینگے۔وزیرِاعظم نے کہا کہ زخمیوں کے علاج کا تمام خرچ وفاقی حکومت اٹھائیگی۔

اپنا تبصرہ لکھیں