ممبئی(ایجنسیاں)بھارتی فلم انڈسٹری کے سینئر اداکار نصیرالدین شاہ نے ایک رپورٹر پر ہراساں کرنے کا الزام عائد کرتے ہوئے شدید برہمی کا اظہار کیا ہے۔ نصیرالدین شاہ نے ممبئی یونیورسٹی کی جانب سے ’جشنِ اردو‘ تقریب میں آخری لمحے میں مدعو نہ کیے جانے کا واقعہ اپنے کالم میں بیان کیا، جس کے بعد میڈیا نمائندوں کی جانب سے مسلسل سوالات اور ہراسانی کا سامنا کرنا پڑا۔
میڈیا سے گفتگو کے دوران نصیرالدین شاہ نے رپورٹر سے کہا کہ “میں اس معاملے پر بات نہیں کرنا چاہتا، براہِ کرم مجھے ہراساں نہ کریں۔” جب رپورٹر نے مزید سوالات کیے تو انہوں نے کہا، “آپ مائیک میرے چہرے پر کیوں دھکیل رہے ہیں؟ آپ مجھے تنگ کر رہے ہیں، مائیک میرے چہرے سے ہٹائیں۔”
اداکار نے مزید کہا کہ “کیا آپ دیکھ نہیں سکتے کہ میں سفر سے آیا ہوں؟ میں نے شائستگی سے کہا ہے کہ میں اس موضوع پر بات نہیں کرنا چاہتا، پھر آپ مجھے کیوں ہراساں کر رہے ہیں؟” رپورٹر کی تردید پر انہوں نے جواب دیا، “آپ مجھے ہراساں کر رہے ہیں، کیا آپ میری بات سمجھ رہے ہیں؟”
سوشل میڈیا پر رپورٹر کے رویے پر شدید ردِعمل سامنے آیا، جہاں متعدد صارفین نے اسے غیر پیشہ ورانہ قرار دیا۔ ایک صارف نے کہا کہ مہذب معاشرے میں ایسے رپورٹر کو جیل میں ہونا چاہیے، جبکہ ایک اور صارف نے کہا کہ “میں یہ ویڈیو دیکھ کر رپورٹر کو تھپڑ مارنا چاہتا تھا۔”
اپنے کالم میں نصیرالدین شاہ نے بتایا کہ وہ جشنِ اردو کی تقریب میں شرکت کے لیے پُرجوش تھے کیونکہ یہ طلبہ سے بات چیت کا موقع فراہم کرتا، تاہم 31 جنوری کی رات انہیں بغیر کسی وجہ کے شرکت سے روک دیا گیا اور کسی قسم کی معذرت بھی نہیں کی گئی۔ بعد میں یونیورسٹی نے اعلان کیا کہ انہوں نے خود تقریب میں شرکت سے انکار کیا، جسے نصیرالدین شاہ نے مزید توہین آمیز عمل قرار دیا۔
نصیرالدین شاہ بھارتی سنیما کے باوقار اداکاروں میں شمار ہوتے ہیں، جنہوں نے متعدد فلموں میں اپنی اداکاری سے ناقدین اور شائقین کی داد حاصل کی ہے۔
