امریکا پاک-بھارت تجارت میں مدد کیلئے بھی تیار ہے: ڈونلڈ ٹرمپ

واشنگٹن(نمائندہ خصوصی)امریکی صدر ڈونلڈ ٹرمپ نے کہا کہ امریکا پاک-بھارت تجارت میں مدد کیلئے بھی تیار ہے۔ذرائع کے مطابق امریکی صدر کا گفتگو کرتے ہوئے کہنا تھا کہ امریکا نے سیز فائر میں دونوں ملکوں کی بہت مدد کی، پاکستان اور بھارت میں جوہری جنگ روک دی، دونوں ممالک کے رہنما غیر متزلزل ہیں۔

ڈونلڈ ٹرمپ نے کہا کہ اس تاریخی لمحے کی بات کرنا چاہوں گا ہفتے کو میری انتظامیہ نے پاکستان اور بھارت کے درمیان فوری جنگ بندی کروائی، میرا خیال ہے کہ یہ مستقل سیز فائر ہے۔ان کا کہنا تھا کہ پاکستان اور بھارت نے خطرناک تنازع کو ختم کیا، جن کے پاس بہت سارے جوہری ہتھیار ہیں۔

انہوں نے کہا کہ مجھے آپ کو بتاتے ہوئے بہت فخر ہو رہا ہے کہ پاکستان اور بھارت قیادت غیر متزلزل اور طاقتور ہے، دونوں ممالک نے موجودہ کشیدہ صورتحال کی سنگینی کو سمجھتے ہوئے دانشمندی اور حوصلے کا مظاہرہ کیا۔

ان کا کہنا تھا کہ امریکا نے اس معاملے میں مدد فراہم کی، صدر ٹرمپ نے مزید کہا کہ دونوں ممالک سے کہا کہ آئیے، ہم آپ کے ساتھ بہت زیادہ تجارت کریں گے اگر آپ کشیدگی کو ختم کریں گے تو ہم تجارت کریں گے اگر نہیں تو کوئی تجارت نہیں ہوگی۔

انہوں نے دعویٰ کیا کہ تجارت کو اس انداز میں استعمال کرنا پہلے کبھی نہیں ہوا اور اس حکمت عملی کے بعد دونوں ممالک نے کشیدگی کم کرنے پر آمادگی ظاہر کی۔

یاد رہے کہ 10 مئی کو پاکستان نے بھارتی جارحیت کے جواب میں کارروائی کا آغاز کرتے ہوئے بھارت کے خلاف ’آپریشن بنیان مرصوص‘ (آہنی دیوار) شروع کر دیا تھا اور بھارت میں ادھم پور، پٹھان کوٹ، آدم پور ایئربیسز اور کئی ایئرفیلڈز سمیت براہموس اسٹوریج سائٹ اور ایس 400 میزائل دفاعی نظام کے علاوہ متعدد اہداف کو تباہ کردیا تھا۔

سیکیورٹی ذرائع نے بتایا تھا کہ پاکستان کے عوام اور مساجد کو جن ایئربیسز سے ٹارگٹ کیا گیا تھا، ان اہداف کو نشانہ بنایا گیا۔ 10 مئی کی سہ پہر امریکی صدر ڈونلڈ ٹرمپ نے کہا تھا کہ پاکستان اور بھارت فوری اور مکمل سیز فائر کیلئے تیار ہوگئے۔سماجی رابطے کی ویب سائٹ ایکس پر جاری بیان میں امریکی صدر نے اس بات کا انکشاف کیا تھا۔