ورجینیا(رائٹرز)امریکی وزیرِ دفاع پیٹ ہیگسیتھ نے اگلے ہفتے ورجینیا کے کوانٹیکو میں دنیا بھر سے سینئر امریکی فوجی افسران کو غیر معمولی اجلاس کے لیے طلب کر لیا ہے۔ یہ اجلاس ایک ہی جگہ پر امریکی فوجی قیادت کے اجتماع کے طور پر غیر معمولی سمجھا جا رہا ہے۔
رپورٹس کے مطابق، اس اچانک طلبی سے کئی سینئر افسران کے شیڈول متاثر ہوئے ہیں، کیونکہ بعض افسر ہزاروں فوجیوں کی کمان کرتے ہیں اور ان کی منصوبہ بندی کئی ہفتے پہلے سے طے ہوتی ہے۔ نام ظاہر نہ کرنے والے ایک امریکی عہدیدار کے مطابق شرکا کو اپنی منصوبہ بندی بدل کر فیصلہ کرنا پڑ رہا ہے کہ آیا وہ اجلاس میں شرکت کریں یا نہیں۔
ابھی یہ واضح نہیں کہ اجلاس میں کتنے افسران شریک ہوں گے، اور اس کا مقصد بھی عوام کے لیے خفیہ رکھا گیا ہے۔ پینٹاگون کے ترجمان شان پرنیل نے کہا کہ وزیرِ دفاع آئندہ ہفتے اپنے سینئر فوجی رہنماؤں سے خطاب کریں گے، جبکہ وائٹ ہاؤس کے نائب صدر جے ڈی وینس کا کہنا ہے کہ اس قسم کا اجلاس بالکل غیر معمولی نہیں ہے۔
یہ اجلاس اہمیت اس لیے بھی رکھتا ہے کیونکہ امریکہ کے فوجی دنیا بھر میں تعینات ہیں، جن میں جنوبی کوریا، جاپان اور مشرق وسطیٰ جیسے دور دراز مقامات شامل ہیں، اور ان کی کمان 2، 3 اور 4 اسٹار جرنیل اور ایڈمرلز کے ہاتھ میں ہے۔
اگرچہ یہ اجلاس کچھ حلقوں کیلئےغیر معمولی تصور کیا جا رہا ہے، مگر اس کی وضاحت نہ ہونے کی وجہ سے امریکی فوج اور عوام میں بے یقینی کی کیفیت پائی جاتی ہے۔
