بادن بادن، جرمنی (شوکت گورایہ)جرمنی کے دلکش اور خوبصورت سیاحتی مقام بادن بادن میں آج بچوں کی سالانہ دوڑ کا رنگا رنگ ایونٹ منعقد ہوا، جہاں پانچ سے بارہ سال کی عمر کے بچے بھاگتے، ناچتے اور اپنی معصوم خوشیوں کا کھلا اظہار کرتے نظر آئے۔
یہ تقریب محض کھیل نہیں تھی بلکہ بچوں کی جسمانی صحت، ذہنی تندرستی اور خوشی کو فروغ دینے کا ایک بامقصد ذریعہ تھی۔ بچوں نے 100 میٹر سے لے کر 10 کلومیٹر تک مختلف فاصلے طے کیے اور ہر قدم ان کے حوصلے، برداشت اور مثبت توانائی کا آئینہ دار تھا۔
تقریب کی سب سے خاص بات یہ تھی کہ اس رنگارنگ دوڑ کو دیکھنے کیلئےنہ صرف مقامی جرمن شہریوں نے بھرپور شرکت کی بلکہ دنیا بھر سے آئے ہوئے غیر ملکی سیاحوں نے بھی بادن بادن کا رخ کیا۔ بچوں کی بھاگ دوڑ، موسیقی کی دلکش دھنیں، اور والدین کی جوش و خروش سے بھری حوصلہ افزائی نے اس تقریب کو ایک عالمی فیسٹیول میں تبدیل کر دیا۔
تقریب کے اختتام پر جیتنے والے بچوں میں میڈلز اور تحائف تقسیم کیے گئے۔ والدین نے اس صحت مند اور خوشگوار سرگرمی کو سراہتے ہوئے کہا کہ یہ دوڑ صرف ایک مقابلہ نہیں بلکہ بچوں کی زندگی میں خود اعتمادی، صحت مند جسم و دماغ اور خوشیوں کی دوڑ ہے۔
بچوں کے چمکتے چہروں اور سیاحوں کی گہری دلچسپی نے ایک بار پھر ثابت کر دیا کہ بادن بادن کی یہ سالانہ دوڑ اب صرف ایک مقامی روایت نہیں رہی بلکہ دنیا بھر میں صحت مند طرزِ زندگی اور عالمی ہم آہنگی کی ایک علامت بن چکی ہے۔
