برامپٹن(نمائندہ خصوصی)جولائی کے اختتام پر رکن پارلیمنٹ سونیا سدھو نے برامپٹن کے عوام کا شکریہ ادا کیا جنہوں نے پورے مہینے کو کینیڈا کے اتحاد، تنوع اور ترقی کی شاندار عکاسی میں تبدیل کر دیا۔
تفصیلات کے مطابق، ایم پی سونیا سدھو نے شہر بھر میں منعقدہ متعدد کینیڈا ڈے تقاریب میں شرکت کی، جہاں انہوں نے بزرگوں، نوجوانوں، خاندانوں اور مختلف مذاہب کے رہنماؤں سے ملاقاتیں کیں اور کینیڈا کے ورثے اور روشن مستقبل کو خراج تحسین پیش کیا۔ ان تقریبات میں پرچم کشائی، ثقافتی میلوں اور مقامی برادری کے جشن شامل تھے۔
5 جولائی کو ایم پی سدھو نے لوہیڈ پارک میں اپنی سالانہ کینیڈا ڈے باربی کیو کا انعقاد کیا، جس میں سینکڑوں افراد بشمول بزرگ، خاندان، کمیونٹی رہنما اور مذہبی شخصیات نے شرکت کی۔ ایم پی سدھو نے کہا”کینیڈا ڈے ہمارے ملک کی کامیابیوں، آزادیوں اور اس شاندار کمیونٹی کو خراج تحسین پیش کرنے کا دن ہے۔ یہ جشن صرف کھانے یا تفریح کا نہیں بلکہ ایک دوسرے سے جڑنے اور ہماری کثیرالثقافتی پہچان پر فخر کرنے کا موقع ہے۔”
مزید برآں، جولائی کے دوران وزیراعظم مارک کارنی اور وفاقی حکومت نے آئندہ بجٹ 2025 کیلئےمشاورت کا آغاز کیا، جس کا مقصد دنیا کی مضبوط ترین معیشتوں میں سے ایک کے طور پر کینیڈا کو مزید مستحکم بنانا ہے۔
وفاقی حکومت کی ترجیحات میں شامل ہیں عوام کیلئے مہنگائی میں کمی، بشمول مڈل کلاس کیلئے ٹیکس میں کمی اور نئے گھروں (ایک ملین ڈالر سے کم) پر پہلا گھر خریدنے والوں کیلئےجی ایس ٹی کا خاتمہ۔قومی تعمیراتی منصوبوں، رہائش، اور دفاعی صلاحیت میں سرمایہ کاری۔نجی شعبے کی سرمایہ کاری کے ذریعے روزگار کے مواقع اور معیشت کی ترقی۔
ایم پی سدھو نے برامپٹن ساؤتھ کے تمام رہائشیوں سے مشاورت میں حصہ لینے کی اپیل کی تاکہ ان کی آراء کو بجٹ میں شامل کیا جا سکے۔ انہوں نے کہا”بطور آپ کی نمائندہ، میری کوشش ہے کہ برامپٹن ساؤتھ کی ترجیحات اوٹاوا میں پوری طرح سنی جائیں۔ ہم سب مل کر ایک ایسا کینیڈا بنا رہے ہیں جو زیادہ قابلِ برداشت، زیادہ جامع اور زیادہ مضبوط ہو۔”
آخر میں ایم پی سدھو نے عوام سے اپیل کی کہ وہ موسمِ گرما کے دوران اُن کے دفتر سے رابطے میں رہیں تاکہ حکومتی پروگرامز، خدمات اور آئندہ تقریبات کے بارے میں معلومات حاصل کی جا سکیں۔
