برامپٹن، اونٹاریو (نمائندہ خصوصی) برامپٹن سٹی وفاقی حکومت کےاس اعلان کا خیرمقدم کرتی ہے، جس میں میٹرو-ریجن معاہدہ (MRA) کے تحت کینیڈا پبلک ٹرانزٹ فنڈ (CPTF) کے ذریعے ہیزل مک کالین لائٹ ریل ٹرانزٹ (LRT) توسیع کو ڈاؤن ٹاؤن برامپٹن تک لے جانے کے عزم کا اظہار کیا گیا ہے۔ یہ سرمایہ کاری اونٹاریو کے تیسرے سب سے بڑے شہر میں ٹرانزٹ کے مستقبل کو بہتر بنانے میں مدد دے گی، شہریوں کو مؤثر، پائیدار اور قابل اعتماد نقل و حمل سے جوڑے گی۔
کینیڈا کے تیزی سے ترقی کرنے والے شہروں میں سے ایک کے طور پر، برامپٹن اپنے شہریوں کی ضروریات کو پورا کرنے کیلئےٹرانزٹ انفراسٹرکچر کو وسعت دینے کیلئے پُرعزم ہے۔ ہیزل مک کالین ایل آر ٹی منصوبہ اس سمت میں ایک اہم قدم ہے۔ 18 کلومیٹر طویل اور 19 اسٹیشنوں پر مشتمل یہ لائٹ ریل ٹرانزٹ اس وقت مسی ساگا سے برامپٹن گیٹ وے ٹرمینل تک زیر تعمیر ہے۔ مجوزہ چار کلومیٹر کی توسیع ایل آر ٹی کو ڈاؤن ٹاؤن برامپٹن تک لے جائے گی، جس سے شہر کے مرکز سے براہ راست رابطہ قائم ہوگا اور شہریوں اور کاروباروں کیلئے ٹرانزٹ تک رسائی میں بہتری آئے گی۔
اس انقلابی منصوبے سے درج ذیل فوائد حاصل ہونگے .
🔹 بہتر رابطہ: برامپٹن ٹرانزٹ، زُوم، گو ٹرانزٹ اور دیگر علاقائی ٹرانزٹ نیٹ ورکس کے ساتھ ہموار انضمام۔
🔹 ٹریفک میں کمی: عوام کو ٹرانزٹ کے استعمال کی ترغیب دے کر برامپٹن کی مصروف ترین سڑکوں پر ٹریفک کا دباؤ کم کرنا۔
🔹 ماحولیاتی پائیداری: برقی توانائی سے چلنے والی لائٹ ریل گاڑیاں جو تقریباً صفر اخراج پیدا کریں گی۔
🔹 معاشی ترقی: شہری ترقی اور اقتصادی سرگرمیوں کو فروغ دینا، جس کے نتیجے میں متوقع طور پر 33000نئے رہائشی یونٹس اور 17000ملازمتیں پیدا ہوں گی۔
برامپٹن سٹی طویل عرصے سے ہیزل مک کالین ایل آر ٹی کی توسیع کے حق میں آواز بلند کرتا رہا ہے، کیونکہ یہ اس کے نقل و حمل اور اقتصادی ترقی کے منصوبے کا ایک اہم حصہ ہے۔ یہ توسیع برامپٹن کو کاروبار اور جدت طرازی کے مرکز کے طور پر مستحکم کرے گی، جبکہ شہریوں کو مؤثر اور پائیدار ٹرانزٹ سہولیات تک رسائی بھی فراہم کرے گی۔
یہ اعلان اونٹاریو حکومت کے ہیزل مک کالین ایل آر ٹی کو ڈاؤن ٹاؤن برامپٹن تک توسیع دینے کے عزم کو مزید تقویت دیتا ہے، جس میں ریپڈ ٹرانزٹ ٹنل کی ترقی کیلئے فنڈنگ بھی شامل ہے۔ صوبائی سرمایہ کاری موجودہ ٹرانزٹ سسٹمز کے ساتھ ہموار انضمام کو یقینی بناتی ہے اور برامپٹن کے ایک ترقی پذیر اور مربوط ڈاؤن ٹاؤن کے وژن کی حمایت کرتی ہے۔
برامپٹن سٹی اس اہم ٹرانزٹ منصوبے کو آگے بڑھانے کیلئے تمام حکومتی سطحوں کے ساتھ مل کر کام کرنے کا منتظر ہے اور شہر کی ترقی اور خوشحالی کو فروغ دینے والے عالمی معیار کے ٹرانسپورٹ نیٹ ورک کی فراہمی کیلئےپرعزم ہے۔
اس حوالے سے پیٹرک براؤن، میئر، برامپٹن سٹی کا کہناتھا “آج کا اعلان ہیزل مک کالین ایل آر ٹی ایکسٹینشن کو حقیقت بنانے کی جانب ایک اہم پیش رفت ہے۔ کینیڈا کے تیزی سے ترقی کرنے والے شہروں میں سے ایک کے طور پر، یہ ٹرانزٹ حل 33,000 رہائشی یونٹس اور 17,000 سے زائد ملازمتوں کو ممکن بنائے گا، جو ہماری تیز رفتار ترقی کے ساتھ ہم آہنگ ہونے میں مدد دے گا۔ یہ منصوبہ ہمارے شہریوں کیلئےقابل اعتماد، پائیدار اور مؤثر نقل و حمل فراہم کرے گا، جس سے ہمارا ڈاؤن ٹاؤن کور باقی علاقے سے مربوط ہوگا۔ وزیر ایرسکین-سمتھ کے برامپٹن کے دوسرے دورے اور اس انقلابی منصوبے کیلئے وفاقی حکومت کی مالی مدد پر ان کا شکریہ ادا کرتے ہیں، جو عوامی ٹرانزٹ، رہائش اور ڈاؤن ٹاؤن کی ترقی کیلئےاہم ہے۔”
پال وِیسینٹے، ریجنل کاؤنسلر، وارڈز 1 اور 5، چیئرمین، پبلک ورکس اینڈ انجینئرنگ کمیٹی نے کہا “ایل آر ٹی کی توسیع کو ڈاؤن ٹاؤن برامپٹن تک لے جانا ہمارے شہر کیلئےایک انقلابی قدم ہے۔ یہ سرمایہ کاری رابطے کو بہتر بنائے گی، ٹریفک کے دباؤ کو کم کرے گی اور معاشی ترقی کو فروغ دے گی۔ ایک مضبوط ٹرانزٹ نیٹ ورک نہ صرف ماحول کے لیے فائدہ مند ہے بلکہ نئے رہائشی منصوبوں کی تعمیر، کاروباروں کو متوجہ کرنے اور ہمارے شہریوں کے مجموعی معیارِ زندگی کو بہتر بنانے میں بھی معاون ثابت ہوگا۔ ہم اس اگلے مرحلے کیلئےپُرجوش ہیں اور برامپٹن کیلئےعالمی معیار کا ٹرانزٹ انفراسٹرکچر فراہم کرنے کے اپنے عزم پر قائم ہیں۔”
معزز نیتھینئل ایرسکین-سمتھ، وزیر برائے رہائش، انفراسٹرکچر اور کمیونٹیز نے بتایا”ہماری حکومت عوامی ٹرانزٹ پر یقین رکھتی ہے۔ ہم پورے کینیڈا میں عوامی ٹرانزٹ کے بنیادی ڈھانچے کو بہتر بنانے اور اس میں وسعت دینے کے لیے پُرعزم ہیں۔ اس ہدف کے حصول کے لیے وفاقی، صوبائی اور بلدیاتی حکومتوں کے درمیان مضبوط تعاون ناگزیر ہے۔”
اس موقع پرمعزز پرب میت سرکاریہ، وزیرِ ٹرانسپورٹ، اونٹاریونے کہا”جیسے جیسے برامپٹن ترقی کر رہا ہے، وزیرِاعلیٰ فورڈ اور ہماری حکومت نے شہریوں کیلئےعالمی معیار کی ٹرانزٹ سہولیات فراہم کرنے کا منصوبہ بنایا ہے۔ اسی لیے ہم نے ہیزل مک کالین لائن کی توسیع کو ڈاؤن ٹاؤن تک لے جانے اور ایک نئے ٹنل کے قیام کا اعلان کیا، جو روزانہ دسیوں ہزار مسافروں کو فائدہ پہنچائے گا۔ ہم اپنے وفاقی اور بلدیاتی شراکت داروں کے ساتھ مل کر عوامی ٹرانزٹ اور گو سروس کو وسعت دینے اور ہائی وے 413 جیسے طویل المدتی منصوبے بنانے ک کیلئے کام جاری رکھیں گے، تاکہ برامپٹن کے شہریوں کو وہاں پہنچنے میں مدد ملے جہاں انہیں جانا ہو۔”
