بھارت کا اپنی بحریہ کیلئے فرانس سے مزید 26 رافیل طیارے خریدنے کا معاہدہ

نئی دہلی(نامہ نگار)بھارتی وزارت دفاع کا کہنا ہے کہ بھارت نے فرانس سے اپنی بحریہ کیلئے26 رافیل لڑاکا طیارے خریدنے کا معاہدہ کیا ہے جس میں سنگل اور ٹو سیٹ طیارے دونوں شامل ہونگے۔

غیر ملکی خبررساں ادارے کے مطابق بھارتی وزارت دفاع کے ترجمان نے ’اے ایف پی‘ کو بتایا کہ ہم نے فرانس سے 26 رافیل طیاروں کیلئےمعاہدے پر دستخط کر دیے ہیں۔

یورپی ملک کی جانب سے ان طیاروں کی فراہمی کے بعد یہ پہلے سے موجود 36 رافیل طیاروں میں شامل ہو جائیں گے جو نئی دہلی پہلے ہی فرانس سے حاصل کر چکی ہے۔

بھارتی حکومت نے پہلی بار 2023 میں فرانس کے قومی دن (بیسٹیل ڈے) کے موقع پر نریندر مودی کے دورہ فرانس کے دوران 26 رافیل طیارے خریدنے کا ارادہ ظاہر کیا تھا۔

فرانسیسی ایرو اسپیس کمپنی ڈاسو ایوی ایشن کے تیار کردہ یہ طیارے بھارتی ساختہ طیارہ بردار بحری جہازوں سے اڑان بھریں گے اور روسی ساختہ مگ-29 کے طیاروں کی جگہ لیں گے۔

بھارتی وزارت دفاع کے بیان کے مطابق رافیل میرین ایک کیریئر سے اڑان بھرنے والا مکمل طور پر لڑاکا طیارہ ہے، جس کی سمندری ماحول میں آپریشنل صلاحیتیں ثابت شدہ ہیں۔

ان کا مزید کہنا تھا ان طیاروں کی فراہمی 2030 تک مکمل کر دی جائیگی جب کہ عملے کو فرانس اور بھارت میں تربیت دی جائیگی۔بھارتی میڈیا رپورٹس کے مطابق اس معاہدے میں بھارتی بحریہ کی تربیت، سازوسامان، ہتھیار اور دیگر متعلقہ لاجسٹک معاونت بھی شامل ہے۔

اگرچہ تاریخی طور پر روس بھارت کا سب سے بڑا فوجی ساز وسامان فراہم کرنے والا ملک رہا ہے لیکن اب بھارت فرانس، امریکا اور اسرائیل جیسے ممالک سے بھی اہم دفاعی سازوسامان خرید رہا ہے۔