ہرارے:ٹی20 ورلڈ چیمپئن بھارت کو زمبابوے نے ہرارے میں کھیلے گئے لو اسکورنگ میچ میں 13 رنز سے شکست دے دی۔
زمبابوے کی بیٹنگ کا خلاصہ:
زمبابوے نے پہلے بیٹنگ کرتے ہوئے مقررہ 20 اوورز میں 9 وکٹوں پر 115 رنز بنائے۔ کلائیو مناڈے 29 رنز بنا کر ناٹ آؤٹ رہے۔ ڈائن مائرز نے 23، برائن بینٹ نے 22 اور ویسلے مادھیورے نے 21 رنز کی اننگز کھیلیں۔
بھارت کی باؤلنگ کا جائزہ:
بھارت کی جانب سے روی بشنوئی نے شاندار کارکردگی کا مظاہرہ کرتے ہوئے 4 کھلاڑیوں کو آؤٹ کیا، واشنگٹن سندر نے دو جبکہ اویش خان اور مکیش کمار نے ایک ایک وکٹ لی۔
بھارت کی ناکام بیٹنگ:
116 رنز کے ہدف کے تعاقب میں عالمی چیمپئن ٹیم آخری اوور میں 102 رنز پر آل آؤٹ ہوگئی۔
کپتان شبمن گل 31 رنز بنا کر ٹاپ اسکورر رہے۔
زمبابوے کی شاندارباؤلنگ:
زمبابوے کے سکندر رضا اور ٹینڈائی چتارا نے بہترین باؤلنگ کرتے ہوئے 3، 3 کھلاڑیوں کو آؤٹ کیا۔ سکندر رضا کو عمدہ بولنگ پرفارمنس پر میچ کا بہترین کھلاڑی قرار دیا گیا۔
بھارتی ٹیم کے اہم کھلاڑیوں کی عدم موجودگی:
ٹی ٹوئنٹی ورلڈ کپ جیتنے والی بھارتی ٹیم کے 15 رکنی اسکواڈ کا کوئی پلیئر اس میچ میں شامل نہیں تھا، جبکہ زمبابوے ٹیم ٹی ٹوئنٹی ورلڈ کپ کے لیے کوالیفائی کرنے والی 20 ٹیموں میں شامل نہیں تھی۔
2016 ءکے بعد زمبابوے کی پہلی فتح:
یہ بھی قابل ذکر ہے کہ 2016 ءکے بعد کسی بھی فارمیٹ میں بھارت کے خلاف زمبابوے کی یہ پہلی فتح ہے۔
