تیانجن(نمائندہ خصوصی) شنگھائی تعاون تنظیم (ایس سی او) کے سربراہی اجلاس کے موقع پر وزیراعظم پاکستان محمد شہباز شریف اور ترکیہ کے صدر رجب طیب اردوان کے درمیان اہم ملاقات ہوئی۔
“سیلاب پر اظہارِ ہمدردی”
صدر اردوان نے پاکستان میں حالیہ مون سون بارشوں اور سیلاب سے قیمتی جانوں کے ضیاع اور مالی نقصانات پر گہرے دکھ اور ہمدردی کا اظہار کیا۔ انہوں نے کہا کہ ترکیہ مشکل وقت میں پاکستان کے ساتھ کھڑا ہے اور حکومت و عوام متاثرہ پاکستانی بھائیوں کے شانہ بشانہ ہیں۔
“دوطرفہ تعلقات”
دونوں رہنماؤں نے پاک-ترک تعلقات پر اطمینان کا اظہار کرتے ہوئے سیاسی، اقتصادی، دفاعی اور سلامتی کے شعبوں میں تعاون کو مزید بڑھانے پر اتفاق کیا۔ انہوں نے اعلیٰ سطح پر جاری تبادلوں اور مشترکہ کاوشوں کو خطے کے امن اور ترقی کے لیے اہم قرار دیا۔
“فلسطین پر یکساں مؤقف”
ملاقات میں غزہ کی بگڑتی ہوئی صورتحال پر گہری تشویش کا اظہار کیا گیا۔ وزیراعظم شہباز شریف اور صدر اردوان نے فلسطینی عوام کے حقوق کی بھرپور حمایت اور اسرائیلی جارحیت و نسل کشی کی پالیسیوں کی شدید مذمت کی۔ دونوں رہنماؤں نے اس عزم کو دہرایا کہ عالمی فورمز پر مل کر فلسطین کے لیے آواز بلند کریں گے۔
“باہمی اعتماد”
دونوں ممالک کے رہنماؤں نے گہرے برادرانہ تعلقات پر اعتماد ظاہر کیا اور مسلم دنیا سمیت عالمی امن، استحکام اور خوشحالی کے لیے تعاون کو مزید مضبوط بنانے پر اتفاق کیا۔
