سعودی عرب فٹبال فیڈریشن نے پاکستان ویمن فٹبال ٹیم کو دوستانہ میچ کھیلنے کیلئےدعوت دی ہے۔رپورٹس کے مطابق سعودی عرب نے اس ماہ فیفا ونڈو میں خواتین فرینڈلی میچ کیلئےپی ایف ایف سے رابطہ کیا ہے۔
سعودی عرب کی جانب سے قطر میں پاکستان سے ویمن فٹبال میچ کھیلنے کی پیشکش کی گئی ہے، خواتین کی فیفا فرینڈلی ونڈو 25 نومبر سے 7 دسمبر کے درمیان ہے۔پاکستان فٹ بال فیڈریشن نے اس حوالے سے سعودی عرب سے میچ کھیلنے پر دلچسپی کا اظہار کیا ہے۔سعودی فٹبال فیڈریشن میچ کیلئے پاکستان ٹیم کے تمام اخراجات بھی برداشت کرے گی، میچ کیلئےدونوں ٹیموں کا تربیتی کیمپ بھی قطر میں ہی لگایا جائے گا۔
دوسری جانب عالمی شہرت یافتہ فٹبالر کرسٹیانو رونالڈ ریکارڈ پر ریکارڈ بنائے جا رہے ہیں اب وہ دنیا میں 900 گول کرنے والے پہلے فٹبالر بھی بن گئے ہیں۔پرتگالی سپر اسٹار کرسٹیانو رونالڈو نے گزشتہ روز نیشنز لیگ میں کروشیا کے خلاف میچ میں اپنے کیریئر کا 900 واں گول کیا۔ اس میں میں ان کی ٹیم کو دو، صفر سے کامیابی ملی۔
یہ کارنامہ انجام دینے کے بعد39 سالہ کھلاڑی رونالڈو جذباتی ہوگئے۔ ان کی آنکھوں سے خوشی کے آنسو جاری ہوئے اور وہ زمین پر بیٹھ گئے۔یہ سنگ میل عبور کرنے کے بعد انہوں نے سوشل میڈیا پر اپنے تاثرات کا اظہار کرتے ہوئے کہا کہ ”میں نے یہی خواب دیکھا تھا اور میرے مزید خواب ہیں۔ آپ سب کا شکریہ۔“
واضح رہے کہ کرسٹیانو رونالڈو نے اب تک اپنے کیریئر میں قومی ٹیم پرتگال کیلئے131، ریال میڈرڈ کیلئے450، مانچسٹر یونائیٹڈ کیلئے 145، جووینٹس کیلئے101، اپنے موجودہ کلب النصر کیلئے68 اور ساتھ ہی اپنے پہلے کلب اسپورٹنگ لزبن کیلئے5 گول کیے ہیں۔
