ریاض(خصوصی رپورٹ)سعودی عرب کے محکمہ ٹریفک کا کہنا ہے کہ 18 اپریل 2024 سے پہلے ہونیوالی ٹریفک خلاف ورزیوں پر جرمانوں کی ادائیگی میں 50 فیصد رعایت کی مہلت دی گئی ہے۔سعودی خبر رساں ادارے کی رپورٹ کے مطابق مہلت ختم ہونے کے بعد رعایت ختم ہوجائے گی،آخری تاریخ 18 اپریل 2025 ہے۔
محکمہ ٹریفک کا اپنے بیان میں کہنا تھا کہ جو لوگ جرمانے یکمشت ادا نہیں کرسکتے وہ اپنی سہولت کے مطابق ایک ایک کرکے خلاف ورزیوں کے جرمانے ادا کرسکتے ہیں۔سعودی عرب کے محکمہ ٹریفک کے بیان میں اس بات کا اعادہ کیا گیا کہ روڈ سیفٹی یقینی بنانے کیلئےٹریفک ضابطوں کی پابندی ضروری ہے۔
دوسری جانب متحدہ عرب امارات (یو اے ای) میں گزشتہ سال منظور ہونیوالے نئے ٹریفک قوانین پر رواں برس 20 مارچ سے عمل درآمد شروع کردیا جائے گا۔رپورٹ کے مطابق متحدہ عرب امارات میں نئے ٹریفک قوانین میں 10 شقوں کی وضاحت کی گئی ہے جن میں ڈرائیونگ لائسنس کے اجرا کیلئے بنیادی طورپر 4 شرائط رکھی گئی ہیں۔
متعلقہ ادارے کو قانون کی شق نمبر 12 کے مطابق یہ اختیار حاصل ہوگا کہ وہ ڈرائیونگ لائسنس کو اس وقت معطل کردے جب یہ ثابت ہو کہ لائسنس ہولڈر جسمانی طورپر فٹ نہیں رہا اس صورت میں لائسنس کی تجدید کو بھی روکا جاسکتا ہے۔
شق نمبر31 کے مطابق اگر لائسنس ہولڈر سے مختلف نوعیت کے جرائم جن میں غفلت کی وجہ سے ٹریفک حادثے میں فریق مخالف کی موت ہونا یا سنگین نقصان پہنچنا،نشے کی حالت میں ڈرائیونگ کرنا، حادثے کی صورت میں اپنی شناخت کو چھپانے کیلئےغلط بیانی کرنا، خطرناک انداز میں گاڑی چلانااور حادثے کے بعد جائے وقوعہ سے فرار ہونے کی کوشش کرنا شامل ہے۔
