اسلام آباد(نمائندہ خصوصی)صدرِ پاکستان آصف علی زرداری اور بلاول بھٹو زرداری نے شہید بے نظیر بھٹو کو ان کی جمہوریت، انسانی حقوق، اور قانون کی حکمرانی کیلئےجدوجہد، قربانیوں اور وابستگی پر زبردست خراجِ عقیدت پیش کیا ہے۔
شہید محترمہ بے نظیر بھٹو کی 72ویں سالگرہ کے موقع پر اپنے پیغام میں صدر زرداری نے کہا کہ بے نظیر بھٹو نے آمریت کے خلاف جرات اور ثابت قدمی کے ساتھ مزاحمت کی۔انہوں نے کہا کہ ہم بے نظیر بھٹو کے وژن سے رہنمائی حاصل کر کے جمہوریت کو مزید مضبوط کریں گے۔
صدر کا کہنا تھا کہ بے نظیر بھٹو پسماندہ طبقات اور اقلیتوں کی آواز تھیں اور وہ ایک پرامن اور خوشحال پاکستان کی خواہاں تھیں۔ انہوں نے کہا کہ محترمہ بے نظیر بھٹو خواتین کی سماجی و اقتصادی خودمختاری کی علمبردار رہیں۔
“جمہوریت کیلئے قربانی، ماں کی صورت میں رہنما” —بلاول بھٹو زرداری کا شہید بے نظیر بھٹو کوخراجِ عقیدت
پاکستان پیپلز پارٹی کے چیئرمین بلاول بھٹو زرداری نے اپنی والدہ، شہید محترمہ بے نظیر بھٹو کی 72ویں سالگرہ کے موقع پر ایک جذباتی بیان میں کہا ہے”آج، جب میری والدہ کی 72ویں سالگرہ ہوتی، میں صرف ایک ماں کی محبت کی گرمی کو نہیں، بلکہ ایک ایسے رہنما کی ناقابل تسخیر روح کو یاد کرتا ہوں جس نے آمریت کو چیلنج کیا جبر کو للکارا، اور بے زبانوں کو زبان دی۔”
بلاول بھٹو زرداری نے کہا”شہید محترمہ بے نظیر بھٹو اُس وقت ثابت قدم رہیں جب دوسرے پیچھے ہٹ گئے۔ انہوں نے جمہوریت، قانون کی حکمرانی، اور ہر پاکستانی — سندھ کے کسان، پنجاب کے مزدور، بلوچستان کے طالب علم، اور خیبرپختونخوا کی امن کی دعا گو ماؤں — کے حقوق کیلئےسب سے بڑی قربانی دی۔”
انہوں نے مزید کہا”ان کا لہو ہماری نازک جمہوریت کی جڑوں کو سیراب کرتا ہے۔ ان کی میراث ہمیں یاد دلاتی ہے کہ جمہوریت کوئی عطیہ نہیں — یہ قربانی سے حاصل کی جاتی ہے، جدوجہد سے محفوظ کی جاتی ہے، اور اتحاد سے پروان چڑھتی ہے۔”
بلاول بھٹو زرداری نے اپنے عزم کا اعادہ کرتے ہوئے کہا”بطور بیٹا، اور ان کے مشن کے وارث کے طور پر، میں اُس پاکستان کیلئےاپنی وابستگی برقرار رکھتا ہوں۔”
سالگرہ مبارک ہو، میری ماں۔ آپ آج بھی زندہ ہیں — ہمارے دلوں میں، ہماری جدوجہد میں، اور پاکستان کی تقدیر میں۔
دوسری جانب سندھ اسمبلی میں بھی بے نظیر بھٹو کی سالگرہ کو محبت بھرے انداز میں یاد کیا گیا اور ان کیلئےدعائیں کی گئیں۔اس موقع پر وزیرِ اعلیٰ سندھ مراد علی شاہ، اسپیکر سید اویس قادر شاہ، ڈپٹی اسپیکر انتھونی نوید، اور پاکستان پیپلز پارٹی کے سینئر رہنماؤں نے سالگرہ کا کیک کاٹا۔
وزراء، اراکینِ اسمبلی اور پارٹی کارکنان نے محترمہ بے نظیر بھٹو کی یادیں تازہ کیں اور ان کی جرات، ہمدردی اور وژن کو خراجِ عقیدت پیش کیا۔
