عالمی منڈی میں تیل کی قیمتیں 2021 کے بعد نچلی ترین سطح پر آچکی ہیں
ہانگ کانگ 10 فیصد، ٹوکیو 8 فیصد اور تائی پے میں اسٹاک مارکیٹ 9 فیصد گرگئی
علی بابا کے شیئرز میں 14 فیصد گراوٹ، آپ کو کسی چیز کو ٹھیک کرنے کیلئےدوا لینی پڑتی ہے:ٹرمپ
کراچی(نیوزڈیسک)امریکی صدر ڈونلڈ ٹرمپ کے ٹیرف کے نفاذ کے بعد چین کی جانب سے امریکا پر بھاری محصولات عائد کیے جانے کے بعد تجارتی جنگ بڑھنے سے پاکستان اسٹاک ایکسچینج میں کے ایس ایس 100 انڈیکس میں 3 ہزار 882 پوائنٹس کی کمی ریکارڈ کی گئی، شدید مندی کی وجہ سے کاروبار 45 منٹ کیلئےروک کر پھر بحال کیا گیا، عالمی اسٹاک مارکیٹیں بھی کریش کر گئیں۔
پاکستان اسٹاک ایکسچینج کی ویب سائٹ کے مطابق بینچ مارک کے ایس ای 100 انڈیکس 3 ہزار 882 پوائنٹس یا 3.27 فیصد کی کمی سے ایک لاکھ 14 ہزار 909 پوائنٹس کی سطح پر آگیا جو آخری کاروباری روز ایک لاکھ 18 ہزار 791 پر بند ہوا تھا۔یاد رہے کہ ٹریڈنگ کے دوران ایک موقع پر پاکستان اسٹاک مارکیٹ میں 8 ہزار 500 سے زائد پوائنٹس کی کمی بھی ریکارڈ کی گئی تھی۔
اے کے ڈی سیکیورٹیز کے ڈائریکٹر ریسرچ اویس اشرف نے اس کمی کی وجہ سرمایہ کاروں کے اس خدشے کو قرار دیا ہے کہ امریکی صدر کی جانب سے ٹیرف میں اضافے سے کمزور طلب کی وجہ سے عالمی کساد پیدا ہوسکتی ہے۔انہوں نے کہا کہ ہم یقین رکھتے ہیں کہ درآمدات پر مبنی معیشت ہونے کے ناطے امریکی محصولات کے نفاذ سے ہمیں عالمی اجناس کی قیمتوں میں ممکنہ کمی کی وجہ سے فائدہ ہوگا۔
چیز سیکیورٹیز کے ڈائریکٹر ریسرچ یوسف ایم فاروق نے کہا کہ عالمی کساد کے خدشے کی وجہ سے ایشیائی مارکیٹیں بڑے پیمانے پر نیچے آئی ہیں۔تاہم کے ایس ای 100 انڈیکس میں صرف 2.5 فیصد کمی آئی ہے جو دیگر علاقائی مارکیٹوں کے مقابلے میں نسبتاً معمولی کمی ہے۔انہوں نے نوٹ کیا کہ تیل اور بینکنگ اسٹاک میں فروخت کا قابل ذکر دباؤ تھا۔
انہوں نے کہا کہ تیل کی قیمتوں میں کمی سے تیل تلاش کرنے والی کمپنیوں کی آمدنی پر منفی اثر پڑنے کی توقع ہے، انہوں نے اس بات پر روشنی ڈالی کہ اس کے ساتھ ہی، ٹیکسٹائل برآمد کنندگان کو نئے امریکی محصولات سے مشکلات کا سامنا کرنا پڑ سکتا ہے۔
یوسف ایم فاروق نے کہا کہ اگرچہ یہ محصولات خاص طور پر ٹیکسٹائل کے شعبے کیلئےقلیل مدتی خطرات پیدا کرتے ہیں، لیکن امریکی تجارتی پالیسی کے مجموعی اثرات پاکستان کیلئے مثبت ثابت ہوسکتے ہیں، خاص طور پر اگر اجناس کی قیمتیں کم رہتی ہیں۔انہوں نے کہا کہ ٹیکسٹائل سیکٹر کو براہ راست اور بالواسطہ (پہلے اور دوسرے مرحلے) کے اثرات کی وجہ سے منافع کے چیلنجز کا سامنا کرنا پڑ سکتا ہے۔
ان کا کہنا تھا کہ تاہم، عالمی اجناس کی قیمتوں میں کمی سے مقامی سطح پر افراط زر کے دباؤ کو کم کرنے میں مدد مل سکتی ہے، جس سے ممکنہ طور پر شرح سود کم ہوسکتی ہے اس کے نتیجے میں ویلیو ایشن میں بتدریج بحالی میں مدد مل سکتی ہے۔حکومت کے کردار کے بارے میں انہوں نے اس بات پر زور دیا کہ وفاقی حکومت کو پاکستانی مصنوعات سے محصولات کے خاتمے کیلئے تیزی سے آگے بڑھنا ہوگا اور مذاکرات شروع کرنا ہونگے۔
ٹاپ لائن سیکیورٹیز کے چیف ایگزیکٹیو محمد سہیل نے بھی اس کمی کی وجہ عالمی مارکیٹ میں گراوٹ کو قرار دیا۔وبائی امراض کے بعد سے اب تک کے بدترین دن سرمایہ کاروں کی جانب سے حصص کی قیمتوں میں اضافے کے باعث فروخت کی لہر پر قابو پا لیا گیا۔
ہانگ کانگ میں 10 فیصد، ٹوکیو میں 8 فیصد اور تائی پے میں 9 فیصد سے زائد کی کمی ریکارڈ کی گئی۔وال اسٹریٹ کی مارکیٹوں کے فیوچرز میں بھی ایک بار پھر مندی دیکھی گئی جب کہ طلب پر پڑنے والے اثرات کے بارے میں خدشات میں بھی اجناس میں کمی دیکھی گئی۔
جمعہ کو ایشیائی مارکیٹوں کی بندش کے بعد چین نے کہا کہ وہ 10 اپریل سے تمام امریکی مصنوعات پر 34 فیصد جوابی ٹیکس عائد کریگا۔اس نے زمین کے 7 نایاب عناصر پر برآمدی کنٹرول بھی عائد کیا جن میں گیڈولینیم، جو عام طور پر ایم آر آئی میں استعمال ہوتا ہے، اور یٹریم جو صارفین کے الیکٹرانکس میں استعمال ہوتا ہے۔
ایشیا میں فروخت کا سلسلہ جاری رہا اور کوئی بھی شعبہ اس وحشیانہ فروخت سے محفوظ نہیں رہا، ٹیکنالوجی کمپنیاں، کار ساز ادارے، بینک، کیسینو اور انرجی فرم سبھی کو اس تکلیف کا سامنا کرنا پڑا، کیونکہ سرمایہ کاروں نے خطرناک اثاثوں کو چھوڑ دیا۔
سب سے زیادہ نقصان اٹھانے والوں میں چینی ای کامرس ٹائٹنز علی بابا 14 فیصد سے زیادہ اور حریف JD.com میں 13 فیصد کمی ریکارڈ کی گئی، جب کہ جاپانی ٹیکنالوجی سرمایہ کاری کمپنی سافٹ بینک میں 10 فیصد سے زیادہ اور سونی میں 9.6 فیصد کی کمی ریکارڈ کی گئی۔
شنگھائی میں 6 فیصد اور سنگاپور کی مارکیٹوں میں 8 فیصد سے زیادہ کمی واقع ہوئی، جب کہ سیئول نے 5 فیصد سے زیادہ کی کمی دیکھی جس کے نتیجے میں 8 ماہ میں پہلی بار ایک نام نہاد سائڈکار میکانزم شروع ہوا جس نے کچھ وقت کیلئے ٹریڈنگ روک دی۔
سڈنی، ویلنگٹن، منیلا اور ممبئی بھی ’گہرے سرخ رنگ‘ میں تھے، موڈیز اینالٹکس کے ایشیا پیسیفک کے چیف اکانومسٹ اسٹیو کوچرن کا کہنا ہے کہ ’ہم دیکھ سکتے ہیں کہ امریکا میں کساد بہت تیزی سے رونما ہو رہی ہے اور یہ سال بھر جاری رہ سکتی ہے‘۔
طلب کے خدشات کے باعث پیر کے روز تیل کی قیمتوں میں 3 فیصد سے زیادہ کی کمی دیکھی گئی، جمعے کے روز اس میں تقریباً 7 فیصد کمی واقع ہوئی تھی، تیل کی قیمتیں 2021 کے بعد نچلی ترین سطح پر آچکی ہیں۔
توانائی ذخیرہ کرنے، الیکٹرک گاڑیاں، سولر پینل اور ونڈ ٹربائن کیلئےایک اہم جزو تانبے نے بھی نقصانات میں اضافہ کیا۔ایس پی آئی ایسٹ مینجمنٹ کے اسٹیفن انس کا کہنا ہے کہ ’مارکیٹ پھر فری فال موڈ میں ہے۔
دوسری جانب ٹرمپ کی ٹیم کی جانب سے محصولات کو جیت کے طور پر دیکھا جا رہا ہے، نہ کہ سودے بازی کے طور پر، یہ نقصانات جمعہ کے روز وال اسٹریٹ میں بدترین مندی کے ایک اور دن کے بعد ہوئے، جہاں تینوں اہم انڈیکس تقریباً 6 فیصد گر گئے۔فیڈرل ریزرو کے سربراہ جیروم پاول نے کہا تھا کہ امریکی محصولات سے افراط زر میں اضافہ ہوگا اور شرح نمو سست روی کا شکار ہوگی۔
ٹرمپ کے ان اقدامات سے امریکی سینٹرل بینکرز کو سر درد کا سامنا کرنا پڑ سکتا ہے، کیونکہ وہ معیشت کو سہارا دینے کیلئے شرح سود میں کمی کی ضرورت کو متوازن کرنے کی کوشش کر رہے ہیں۔ان کا یہ بیان ایسے وقت میں سامنے آیا ہے جب ٹرمپ نے اصرار کیا تھا کہ ’میری پالیسیاں کبھی تبدیل نہیں ہوں گی‘ اور انہوں نے فیڈرل ریزرو پر زور دیا تھا کہ وہ شرح سود میں کمی کرے۔
اسٹیفن انس نے کہا کہ جیروم پاول کے ہاتھ بندھے ہوئے ہیں، انہوں نے واضح طور پر تسلیم کیا ہے کہ ٹیرف افراط زر اور کساد کا باعث ہیں، لیکن وہ اس سے بچنے کا اشارہ نہیں دے رہے ہیں اور یہی مسئلہ ہے، اس بار فیڈ کا افراط زر کا مینڈیٹ اسے حفاظتی جال کو برقرار رکھنے پر مجبور کر رہا ہے، جب کہ اثاثوں کی قیمتیں جل رہی ہیں۔
کے سی ایم ٹریڈ کے چیف مارکیٹ تجزیہ کار ٹم واٹرر نے کہا کہ تاجر گھبراہٹ کے ساتھ دیکھ رہے ہیں کہ دو سب سے بڑی معیشتیں محصولات پر قابو پا رہی ہیں، اور انہیں خدشہ ہے کہ دونوں کو طویل معاشی لڑائی کے نتیجے میں ’ناک آؤٹ‘ کا سامنا کرنا پڑ سکتا ہے۔
English
Urdu