سون بھدر/جھارکھنڈ (نیوز ڈیسک) — سوشل میڈیا پر جمی دوستی شادی تک جا پہنچی مگر انجام ایک ڈرامائی تنازع کی صورت میں ہوا، جب شوہر نے دلہن کو اپنے ہی گھر پر پہنچنے کے بعد پہچاننے سے انکار کر دیا۔
بھارتی میڈیا کے مطابق جھارکھنڈ کی ایک لڑکی اور اتر پردیش کے نوجوان کی ملاقات فیس بک پر ہوئی۔ چیٹس اور ویڈیو کالز کے بعد دونوں میں قربت بڑھی اور بالآخر ایک مقامی مندر میں شادی کر لی، جہاں روایتی سات پھیرے بھی مکمل کیے گئے۔
تاہم شادی کے فوراً بعد کہانی نے حیران کن رخ اختیار کیا۔ دلہن کے مطابق جب وہ شوہر کے گھر پہنچی تو دولہے نے صاف کہا: “معاف کرنا، تم کون ہو؟ میں تمہیں نہیں جانتا”۔یہ سن کر دلہن زار و قطار رونے لگی اور گھر کے باہر دھرنا دے دیا۔ معاملہ سنگین ہوتا دیکھ کر مقامی افراد جمع ہوگئے اور پولیس کو مداخلت کرنا پڑی۔
“دلہن کی شکایت”
لڑکی نے تھانے میں تحریری شکایت درج کروائی کہ لڑکے نے فیس بک کے ذریعے دھوکے سے رشتہ جوڑا، شادی کی مگر اب بیوی ماننے سے انکار کر رہا ہے۔ اس نے انصاف اور اپنے حقوق کا تحفظ فراہم کرنے کا مطالبہ کیا۔
“پولیس کی کارروائی”
پولیس حکام کے مطابق معاملے کی تحقیقات شروع کر دی گئی ہیں۔ شادی کے قانونی پہلوؤں اور دلہن کے الزامات کا جائزہ لیا جا رہا ہے، اور شواہد کی بنیاد پر مزید کارروائی عمل میں لائی جائے گی۔یہ واقعہ علاقے میں بحث کا باعث بن گیا ہے اور اس بات کو نمایاں کرتا ہے کہ سوشل میڈیا پر قائم ہونے والے رشتے بعض اوقات زندگی بھر کی مشکلات اور دل ٹوٹنے کا سبب بھی بن سکتے ہیں۔
