ممبئی(ہندوستان ٹائمز)بھارتی پولیس نے قائد اعظم محمد علی جناحؒ کے نواسے اور معروف بزنس ٹائیکون نُسلی نیول واڈیا کے خلاف جعلسازی اور جعلی دستاویزات عدالت میں پیش کرنے کے الزام میں مقدمہ درج کر دیا ہے۔ 81 سالہ نُسلی واڈیا بھارت کے معروف صنعتی رہنماؤں میں شامل ہیں۔
میڈیا رپورٹس کے مطابق، یہ مقدمہ میٹروپولیٹن مجسٹریٹ کورٹ، بوریولی کے حکم پر بانگور نگر پولیس اسٹیشن میں درج کیا گیا۔ عدالت نے پولیس کو ہدایت کی کہ نُسلی واڈیا، ان کی اہلیہ مورین واڈیا، بیٹے نیس واڈیا اور جہانگیر واڈیا سمیت دیگر افراد کے خلاف دھوکہ دہی اور جعلسازی کے الزامات پر ایف آئی آر درج کی جائے۔
مقدمے میں الزام ہے کہ نُسلی واڈیا نے مبینہ طور پر جعلی دستاویزات تیار کیں اور انہیں عدالت میں پیش کیا۔ یہ کیس بھارتی کاروباری حلقوں میں اہمیت اختیار کر چکا ہے، کیونکہ واڈیا خاندان بھارت کی صنعتی تاریخ میں ایک نمایاں کردار ادا کرتا رہا ہے۔
یہ مقدمہ 30 سال پرانے ڈیولپمنٹ ایگریمنٹ کے تنازع سے متعلق ہے، جو واڈیا اور فیرانی ہوٹلز کے درمیان ہوا تھا، اور زمین کی فروخت سے حاصل ہونے والی آمدنی میں تنازعات کی بنیاد پر عدالت تک پہنچا تھا۔واڈیا خاندان کے خلاف یہ مقدمہ بھارت میں قانونی کارروائی کی ایک اہم مثال ہے اور عدالت کی کارروائی اور دستاویزات کی جانچ کے بعد اس معاملے کی تفصیلات مزید واضح ہوں گی۔
