چنئی(انٹرنیشنل کرکٹ کونسل)آئی سی سی ٹی ٹوئنٹی ورلڈ کپ 2026 کے 21ویں میچ میں امریکا قومی کرکٹ ٹیم نے نیدرلینڈز قومی کرکٹ ٹیم کو 93 رنز سے شکست دے دی۔
بھارت کے شہر چنئی میں کھیلے گئے گروپ اے کے میچ میں امریکا نے پہلے بیٹنگ کرتے ہوئے 6 وکٹوں کے نقصان پر 196 رنز اسکور کیے۔ سائی تیجا مکّامالا نے 51 گیندوں پر 79 رنز کی عمدہ اننگز کھیلی، جبکہ شبھم رانجنے نے آخری اوورز میں جارحانہ انداز اپناتے ہوئے 24 گیندوں پر ناقابلِ شکست 48 رنز بنائے۔ نیدرلینڈز کی جانب سے باس ڈی لیڈے نے 37 رنز دے کر 3 وکٹیں حاصل کیں۔
197 رنز کے ہدف کے تعاقب میں نیدرلینڈز کی بیٹنگ لائن امریکی بولنگ کے سامنے زیادہ دیر نہ ٹھہر سکی اور پوری ٹیم 103 رنز پر آؤٹ ہو گئی۔ہرمیت سنگھ نے شاندار کارکردگی کا مظاہرہ کرتے ہوئے 4 اوورز میں 21 رنز کے عوض 4 کھلاڑیوں کو پویلین بھیجا، جبکہ دیگر اسپنرز نے بھی مسلسل دباؤ برقرار رکھتے ہوئے ٹیم کی بڑی فتح میں اہم کردار ادا کیا۔
