لاہور: ٹی ٹونٹی کرکٹ اپنی تیز رفتاری اور غیر متوقع نتائج کے لیے مشہور ہے۔ اس فارمیٹ میں کئی بار ایسا ہوا ہے کہ بظاہر کمزور یا نئی ٹیموں نے مضبوط اور تجربہ کار ٹیموں کو حیران کن شکست دی ہے۔
حال ہی میں، امریکانے پاکستان کو سپر اوور میں شکست دے کر ایک بڑا اپ سیٹ کیا ہے۔
لیکن ٹی ٹونٹی ورلڈ کپ کی تاریخ میں یہ پہلا موقع نہیں جب ایسی بڑی اپ سیٹ دیکھنے کو ملی ہو۔ آئیے ٹی ٹونٹی ورلڈ کپ کے تاریخ کے بڑے اپ سیٹس پر ایک نظر ڈالتے ہیں۔
1: ٹی ٹونٹی ورلڈ کپ 2007: زمبابوے کی آسٹریلیا کے خلاف تاریخی کامیابی
پہلا ٹی ٹونٹی ورلڈ کپ 2007 ءمیں ہوا جس میں زمبابوے نے آسٹریلیا کو شکست دے کر ایک بڑا اپ سیٹ کیا۔ آسٹریلیا کی ٹیم، جس میں ایڈم گلکرسٹ، میتھیو ہیڈن، رکی پونٹنگ اور مائیکل ہسسی جیسے بڑے نام شامل تھے، نے مقررہ 20 اوورز میں نو وکٹوں کے نقصان پر 138 رنز بنائے۔ جواب میں زمبابوے کے وکٹ کیپر برینڈن ٹیلر کے ناقابل شکست 60 رنز کی بدولت زمبابوے نے ہدف ایک گیند قبل حاصل کرکے ٹی ٹونٹی ورلڈ کپ کی تاریخ کا پہلا اپ سیٹ کیا۔
2: ٹی ٹونٹی ورلڈ کپ 2007ء: ویسٹ انڈیز کو بنگلا دیش سے شکست
آسٹریلیا اور زمبابوے کے میچ کے اگلے ہی دن بنگلا دیش نے ویسٹ انڈیز کو شکست دے کر مسلسل دوسرا اپ سیٹ کیا۔ جوہانسبرگ میں کھیلے گئے میچ میں بنگلادیش نے ویسٹ انڈیز کی ٹیم کو 164 رنز پر محدود کردیا۔ بعد ازاں بنگلا دیش نے خود مطلوبہ ہدف 18 اوورز میں حاصل کرلیا۔ بنگلا دیش کی باؤلنگ کے ہیرو شکیب الحسن تھے جنہوں نے چار ویسٹ انڈین بلے بازوں کو پویلین کی راہ دکھائی۔
3: ٹی ٹونٹی ورلڈ کپ 2009: نیدرلینڈز نے انگلینڈ کے خلاف کامیابی حاصل کی
دوسرا ٹی ٹونٹی ورلڈ کپ انگلینڈ میں کھیلا گیا تھا جس میں ٹرافی پاکستان کی ٹیم نے جیتی تھی۔ لیکن اس ایونٹ کا پہلا میچ کافی سنسنی خیز تھا۔ نیدرلینڈز کی ٹیم نے میزبان انگلینڈ کو لارڈز میں اپ سیٹ شکست دی۔ لیوک رائٹ اور روی بوپارا کی سینچری شراکت کی وجہ سے انگلینڈ نے پانچ وکٹوں پر 162 رنز بنائے تھے۔ جواب میں ڈچ ٹیم نے اننگز کی آخری گیند پر ہدف حاصل کرکے انگلش ٹیم کو حیران کردیا تھا۔
4: ٹی ٹونٹی ورلڈ کپ 2009: آئرلینڈ کے ہاتھوں بنگلادیش کو شکست
پہلے ٹی ٹونٹی ورلڈ کپ میں ویسٹ انڈیز جیسی مضبوط ٹیم کو شکست دینے والی بنگلا دیشی ٹیم اپنا پہلا ورلڈ کپ کھیلنے والی آئرلینڈ سے شکست کھا گئی تھی۔ ناٹنگھم میں ٹرینٹ جانسن کے 20 رنز کے عوض تین وکٹوں کی بدولت بنگلا دیشی ٹیم آٹھ وکٹوں پر صرف 137 رنز بناسکی۔ آئرش ٹیم نے نائل اور کیون او برائن کی شاندار بیٹنگ کی وجہ سے اپنے پہلے ورلڈ کپ کے پہلے ہی میچ میں کامیابی حاصل کی۔
5: ٹی ٹونٹی ورلڈ کپ 2014ء: ہانگ کانگ کی بنگلا دیش کے خلاف کامیابی
پانچ سال بعد بنگلادیش کو ہوم گراؤنڈ اور ہوم کراوڈ کے سامنے ہانگ کانگ کی ٹیم نے شکست دے کر سب کو حیران کردیا۔ چٹوگرام میں بنگلا دیش کی ٹیم ہانگ کانگ کے اسپنرز ندیم احمد اور نزاکت خان کے سامنے صرف 108 رنز پر ڈھیر ہوگئی۔ ندیم احمد نے چار اور نزاکت خان نے تین کھلاڑیوں کو آؤٹ کیا۔ 109 رنز کے ہدف کے جواب میں ہانگ کانگ نے مطلوبہ ہدف دو گیندوں قبل ہی آٹھ وکٹ کے نقصان پر حاصل کرلیا۔
6: ٹی ٹونٹی ورلڈ کپ 2014ء: نیدرلینڈز کی انگلینڈ کو ایک اور شکست
چٹوگرام ہی کے مقام پر نیدرلینڈز نے سابق چیمپئن انگلینڈ کو 45 رنز سے شکست دے کر دوسری بار اپ سیٹ کیا۔ انگلش باؤلرز نے ڈچ ٹیم کو پانچ وکٹوں کے نقصان پر 133 رنز تک محدود کردیا۔ جواب میں انگلش ٹیم آغاز سے ہی مشکلات کا شکار رہی اور پوری ٹیم 88 رنز بناکر آؤٹ ہوگئی۔ یہ کسی بھی ایسوسی ایٹ ٹیم کے خلاف آئی سی سی فل ممبر کا سب سے کم اسکور ہے۔
7: ٹی ٹونٹی ورلڈ کپ 2016ء: عمان نے آئرلینڈ کو شکست دی
آئرلینڈ نے ون ڈے اور ٹی ٹونٹی کرکٹ میں اپ سیٹ کرنے کا جو سلسلہ شروع کیا تھا ،اسے عمان نے پانچویں ٹی ٹونٹی ورلڈ کپ میں بریک لگا دیا۔ دھرماشالہ میں کھیلے گئے اس میچ میں مونس انصاری کی باؤلنگ کے آگے آئرش بلے باز صرف پانچ وکٹ پر 154 رنز ہی بناسکے۔ عمانی اوپنرز کے 69 رنز کے شاندار آغاز کے بعد ٹیم مشکلات کا شکار تو ہوگئی تھی لیکن نچلے نمبرز پر بیٹنگ کے لیے آنے والے عامر علی کے 17 گیندوں پر 32 قیمتی رنز عمان کو جیت کے قریب لے آئے۔
8: ٹی ٹونٹی ورلڈ کپ 2016ء: ویسٹ انڈیز کو افغانستان کے ہاتھوں شکست
2016 ءکا ٹی ٹونٹی ورلڈ کپ ویسٹ انڈیز نے اپنے نام کیا تھا لیکن اس ایونٹ میں اسے افغانستان کے ہاتھوں اپ سیٹ شکست کا بھی سامنا کرنا پڑا تھا۔ بھارتی شہر ناگپور میں کھیلے گئے اس میچ میں افغانستان نے پہلے بیٹنگ کرتے ہوئے نجیب اللہ زدران کے 48 ناٹ آؤٹ کی بدولت سات وکٹوں پر 123 رنز بنائے۔ جواب میں ویسٹ انڈیز کی ٹیم مقررہ اوورز میں آٹھ وکٹوں پر صرف 117 رنز ہی بناسکی۔
9: ٹی ٹونٹی ورلڈ کپ 2021ء: اسکاٹ لینڈ نے بنگلادیش کو ہرادیا
ال امیرت میں کھیلے گئے اس میچ میں اسکاٹ لینڈ نے بنگلا دیش کو چھ رنز سے شکست دے کر اپ سیٹ کر دیا۔ میگا ایونٹ کے دوسرے ہی میچ میں اسکاٹ لینڈ نے کرس گریوز کے 45 رنز کی بدولت نو وکٹ پر 140 رنز بنائے تھے۔ جواب میں شکیب الحسن اور مشفق الرحیم کی سلو بیٹنگ کی وجہ سے بنگلا دیشی ٹیم 20 اوورز میں سات وکٹ پر 134 رنز ہی بناسکی۔
10: ٹی ٹونٹی ورلڈ کپ 2022ء: سابق چیمپئن سری لنکا کی نمیبیا کے ہاتھوں شکست
آسٹریلیا کے شہر جلانگ میں کھیلے گئے اس میچ میں نمیبیا نے سابق چیمپئن سری لنکا کو 55 رنز سے شکست دے کر سب کو حیرت میں ڈال دیاتھا۔ نمیبیا کے سات وکٹوں پر 163 رنز کے جواب میں سری لنکن ٹیم صرف 108 رنز بناکر آؤٹ ہوگئی۔ صرف تین سری لنکن بلے باز ڈبل فگرز میں پہنچ سکے تھے۔
11: ٹی ٹونٹی ورلڈ کپ 2022ء: نیدرلینڈز نے جنوبی افریقا کو سیمی فائنل کی دوڑ سے باہر کر دیا
انگلینڈ کو ٹی ٹونٹی ورلڈ کپ میں دو مرتبہ شکست دینے والی ڈچ ٹیم نے 2022 ءمیں جنوبی افریقا کو اپ سیٹ شکست دے کر سیمی فائنل کی دوڑ سے باہر کر دیا تھا۔ نیدرلینڈز نے پہلے کھیلتے ہوئے 20 اوورز میں چار وکٹ پر 158 رنز بنائے۔ جواب میں جنوبی افریقی ٹیم آغاز سے ہی مشکلات کا شکار رہی اور ڈچ باؤلنگ اور فیلڈنگ کے سامنے بے بس نظر آئی۔ برینڈن گلور تین وکٹوں کے ساتھ سب سے کامیاب باؤلر رہے جن کی وجہ سے جنوبی افریقا کے بلے باز صرف آٹھ وکٹوں کے نقصان پر 145 رنز ہی بناسکے۔
