پاکستان اور انگلینڈ کے درمیان ملتان ٹیسٹ کے دوسرے روز کھیل ختم ہونے تک انگلینڈ نے اپنی پہلی اننگز میں 6 وکٹوں کے نقصان پر 239 رنز بنالیے۔ پاکستان نے انگلش بیٹرز کو اسپن جال میں پھنسالیا، آخری سیشن انگلینڈ کے لیے تباہ کن ثابت ہوا اور اس کے 5 بیٹرز یکے بعد دیگرے پویلین لوٹ گئے، دوسرے دن کھیل کے اختتام پر انگلینڈ نے 6 وکٹیں گنوا کر اسکور بورڈ پر 239 رنز کا ہندسہ سجایا۔
انگلش ٹیم کو پاکستان کی پہلی اننگز کی برتری ختم کرنے کیلئے مزید 127 رنز درکار ہیں، انگلینڈ کی جانب سے پہلی اننگز میں اوپنر بین ڈکٹ 114 رنز بناکر نمایاں رہے۔جوروٹ نے 34 اور اولی پاپ نے 29 رنز کی اننگز کھیلی، پاکستانی اسپنرز نے شاندار بولنگ کرتے ہوئے تمام 6 وکٹیں حاصل کیں۔ساجد خان نے انگلش بیٹرز کو مشکلات میں ڈالتے ہوئے 4 پلیئرز کو پویلین کی راہ دکھائی جبکہ نعمان علی نے بھی ان کا ساتھ دیتے ہوئے 2 وکٹ حاصل کیں۔
دریں اثنا نگلینڈ کے خلاف ملتان میں کھیلے جا رہے دوسرے ٹیسٹ میچ کے دوسرے دن پاکستان کی ٹیم پہلی اننگ میں 366 رنز بنا کر آؤٹ ہوگئی۔انگلینڈ اور پاکستان کے درمیان تین ٹیسٹ میچوں کی سیریز کا دوسرا میچ ملتان کرکٹ اسٹیڈیم میں کھیلا جا رہا ہے۔ آج دوسرے روز میزبان ٹیم نے اپنی پہلی نا مکمل اننگ کا آغاز 5 وکٹوں پر 259 رنز سے کیا تھا اور دوسرے سیشن کے آغاز میں ہی ٹیم کے مجموعے میں صرف 107 رنز کا اضافہ کر کے آؤٹ ہوگئی۔
آج پاکستان کی جانب سے گرنے والی پہلی وکٹ محمد رضوان کی تھی جو اپنے گزشتہ روز کے انفرادی اسکور میں صرف 4 رنز کا اضافہ کر کے 41 رنز پر بریڈن کرس کی دوسری وکٹ بن گئے۔ سلمان علی آغا 31 رنز بنانے کے بعد میتھیو پوٹس کی گیند پر اسمتھ کے ہاتھوں کیچ آؤٹ ہو گئے۔ ساجد خان صرف دو رنز کے مہمان ثابت ہوئے۔
کھانے کے وقفے کے عامر جمال 37 رنز بنا کر آؤٹ ہوگئے۔ انہوں نے نعمان علی کے ساتھ مل کر نویں وکٹ کے لیے 50 رنز کی پارٹنر شپ قائم کی۔ نعمان علی 32 رنز کے انفرادی اسکور پر جیک لیک کی چوتھی وکٹ بنے۔انگلینڈ کی جانب سے جیک لیک نے چار، بریڈن کرس تین اور میتھیو پوٹس نے دو وکٹیں حاصل کی ہیں۔
اس سے قبل گزشتہ روز پاکستانی کپتان شان مسعود نے ٹاس جیت کر پہلے بیٹنگ کا فیصلہ کیا۔ 19 رنز پر دو وکٹیں گرنے کے بعد بابر اعظم کی جگہ ٹیسٹ ڈیبیو کرنے والے کامران غلام نے مشکل وقت میں کریز سنبھالی اور پہلے ہی میچ میں سنچری اسکور کی۔وہ پہلے دن کے کھیل کے اختتام سے کچھ دیر قبل ہی 118 رنز کی شاندار اننگ کھیل کر آؤٹ ہوئے تھے جب کہ اوپنر صائم ایوب نے 77 رنز بنائے تھے۔دوسرے ٹیسٹ میچ کے لیے پاکستان کرکٹ ٹیم میں چار جب کہ انگلینڈ نے دو تبدیلیاں کی ہیں۔
پاکستان نے بابر اعظم، شاہین شاہ آفریدی، نسیم شاہ کو آرام دے کر ان کی جگہ کامران غلام، ساجد خان اور نعمان علی کو شامل کیا گیا ہے جب کہ اسپنر ابرار احمد جو بیماری کے باعث ٹیسٹ نہیں کھیل رہے ان کی جگہ زاہد محمود نے پُر کی ہے۔
انگلینڈ کے ریگولر کپتان بین اسٹوکس کی انجری کے بعد ٹیم میں واپسی ہوگئی ہے۔ دوسرے ٹیسٹ میچ کے لیے فاسٹ بولرز گس اٹکنسن اور کرس ووکس کو آرام دیا گیا ہے۔ فاسٹ بولر میٹ پوٹس کو شامل کیا گیا ہے۔
واضح رہے کہ ملتان میں کھیلے گئے پہلے میچ میں انگلینڈ نے پاکستان کو اننگ اور 47 رنز کی عبرت ناک شکست دے کر تین ٹیسٹ میچوں کی سیریز میں ایک صفر کی برتری حاصل کر لی تھی۔مذکورہ سیریز آئی سی سی ورلڈ ٹیسٹ چیمپئن شپ کا حصہ ہے اور پاکستان مسلسل شکستوں کے بعد پوائنٹ ٹیبل پر سب سے آخری نویں نمبر پر پہنچ چکا ہے جس کے بعد اس کے فائنل کھیلنے کا خواب چکنا چور ہوچکا ہے۔
