پاک ،آسٹریا تجارت میں اضافہ ،پاکستانی برآمدات 311 ملین یورو تک پہنچ گئی

ویانا، آسٹریا( محمد عامر صدیق سے) شماریات آسٹریا نے سال 2024 کیلئے آسٹریا کے تجارتی اعداد و شمار شائع کیے ہیں۔ اعداد و شمار سے ظاہر ہوتا ہے کہ پاکستان اور آسٹریا کی تجارت میں گزشتہ سالوں کے مقابلے میں 31.5 فیصد اضافہ ہوا ہے۔ دوطرفہ تجارت 40 ملین یورو سے تجاوز کر گئی جو 6 سالوں میں پہلی بار تھی۔

آسٹریا کو پاکستانی برآمدات میں 33 فیصد اضافہ ہوا اور 311 ملین یورو تک پہنچ گئی۔ برآمدات میں اضافے کی قیادت تیار کردہ اشیا کی وجہ سے ہوئی جس میں ویلیو ایڈڈ ٹیکسٹائل اور گھریلو کپڑے شامل تھے۔ اس رفتار کو آگے بڑھانے کیلئے پاکستان اور آسٹریا کے درمیان 23 اپریل کو ایک اعلیٰ سطحی ورچوئل میٹنگ ہوگی جس میں حکمت عملیوں پر مزید بات چیت اور دوطرفہ تجارت میں اضافہ ہوگا۔ پاکستان کی وزارت خارجہ، وزارت تجارت اور آسٹریا کی وزارت محنت و معیشت کے سینئر حکام کی میٹنگ میں شرکت متوقع ہے۔

آسٹریا اور پاکستان کے درمیان تجارتی تعلقات ہیں، جن میں دونوں ممالک میں ترقی کے کافی امکانات ہیں۔ پاکستان سے اہم درآمدات میں تیار ملبوسات، کپڑے اور لوازمات، چمڑے کے سامان، جوتے، کپاس، ہوائی جہاز اور متعلقہ اجزاء، سیمنٹ، کھلونے اور اناج شامل ہیں۔

اقتصادی چیلنجز اور عالمی ترقی دونوں ممالک کی اقتصادی کارکردگی کو متاثر کر سکتی ہے۔ بہر حال، اقتصادی تعاون دوطرفہ تعلقات کا ایک مرکزی ستون ہے، اور دونوں فریق تجارت کے حجم کو مزید بڑھانے کیلئےپرعزم ہیں۔