پیرس اولمپکس 2024 میں تاریخ رقم کرتے ہوئے سپراسٹار نوواک جوکووچ نے ٹینس میں گولڈ میڈل جیتنے کا اعزاز حاصل کرلیا۔
سرب ٹینس اسٹار نے اولمپکس کے فائنل میں اسپین کے کارلوس الکاراز کو شکست سے دوچار کیا، نوواک جوکووچ نے حتمی مقابلے میں اسٹریٹ سیٹس میں میدان مارا، جوکووچ اولمپکس میں پہلی بارسونے کا تمغہ جیتنے میں کامیاب ہوئے ہیں۔
37 سالہ سرب پلیئر نے اولمپکس میں طلائی تمغہ جیتنے کے بعد مینز ٹینس کے عظیم پلیئر کے طور پر اپنا نام درج کروا لیا ہے۔
ٹینس کے اس سنسنی خیز مقابلے میں، نمبر ون جوکووچ نے نمبر 2 کارلوس الکاراز کو 2 گھنٹے 50 منٹ میں 7-6(3) اور 7-6(2) سے شکست دی۔، یہ 2024 میں جوکووچ کا پہلا ٹائٹل بھی ہے۔
نوواک جوکووچ نے جیتنے کے بعد خوشی سے مغلوب ہوئے کہا کہ میں ابھی کافی جذباتی ہورہا ہوں، میرے محسوسات اس وقت کافی مختلف ہیں۔
انھوں نے کہا کہ میں شاید لاکھوں مختلف جذبات سے گزر رہا ہوں جو یقیناً مثبت ہیں، مجھے بہت فخر ہے، میں بہت خوش ہوں اپنے کیریئر میں پہلی بار طلائی تمغہ جیتنے پر بہت پرجوش ہوں۔
