کوچ،کپتان اور کمیٹی اپنی اپنی ذمہ داریوں کیلئےجواب دہ ہیں:رضوان

لاہور(سپورٹس ڈیسک) ون ڈے کرکٹ ٹیم کےکپتان محمد رضوان نے پے در پے شکستوں کاسارا ملبہ سلیکشن کمیٹی پر ڈالتے ہوئے کہا ہے کہ سب کو معلوم ہے سلیکشن کمیٹی چیزیں کنٹرول کر رہی ہے، کوچ،کپتان اور کمیٹی اپنی اپنی ذمہ داریوں کیلئےجواب دہ ہیں.سابق کپتان بابر اعظم نے سب کے سامنے محتاط رویہ اپنایا۔

لاہور میں پی ایس ایل کپتانوں کی پریس کانفرنس کے دوران گفتگو کرتے ہوئے محمد رضوان نے شکست کی ذمہ داری سے متعلق سوال پر کہا کہ سارے اختیارات سلیکشن کمیٹی کے پاس ہیں،سلیکشن کمیٹی سب کے سامنے آکر اس بات کا اعتراف کرتی ہے۔

انہوں نے کہا کہ سب کو پتا ہے کہ سلیکشن کمیٹی چیزیں کنٹرول کر رہی ہے، کوچز، کپتان اور سلیکشن کمیٹی اپنی اپنی ذمہ داریوں کے لیے چیئرمین پی سی بی کو جواب دہ ہیں۔

قومی ٹیم کے سابق کپتان اور پی ایس ایل فرنچائز پشاور زلمی کے کپتان بابر اعظم نے کہا کہ سب کے سامنے ڈھنڈورا نہیں پیٹتا، جسے بھی مشورہ دینا ہو بند کمرے میں دیتا ہوں۔بابر نے کہا کہ پی ایس ایل میں ہر فرنچائز بہترین اسکواڈ بنانے کی کوشش کرتی ہے، پشاور زلمی نے بیٹنگ اور باؤلنگ کی خامیوں پر قابو پانے کی کوشش کی ہے۔

شاہین شاہ آفریدی نے خراب پرفارمنس کی ذمہ داری قبول کرلی، انہوں نے کہا کہ جس طرح بلے بازوں کی طرح بالرز کی بھی ذمہ داری ہوتی ہے کہ وہ 200 رنز نہ کھائیں اور اگر ٹیم 200 رنز بنائے تو ہماری ذمہ داری ہے کہ وہ آسانی سے حاصل نہ ہوں۔

انہوں نے کہا کہ ہم ایک ہی ٹیم ہیں، ایک ہی خاندان ہیں، اگر کچھ وقت سے کرکٹ زوال کا شکار ہے اور ہماری ہی وجہ سے ہے تو ہم ہی اس کرکٹ کو اوپر لے کر آئیں گے۔

شاہین شاہ آفریدی نے کہا کہ پاکستان کے عوام کرکٹ سے محبت کرتے ہیں، پی ایس ایل کی ٹرافی جو بھی جیتے وہ پاکستان کی جیت ہوگی، انہوں نے کہا کہ پی ایس ایل ایک الگ ٹورنامنٹ ہے، جس کا پریشر الگ ہوتا ہے۔

کراچی کنگز کے نائب کپتان فاسٹ باؤلر حسن علی نے کہا کہ ہم میدان میں صورتحال کے حساب سے کھیلتے ہیں، کمنٹری باکس میں بیٹھ کر باتیں کرنا آسان ہے، میدان میں عمل کرنا مشکل ہوتا ہے، انہوں نے کہا کہ اس بار کراچی کیلئے اچھا کمبی نیشن بنانے کی کوشش کی ہے۔اسلام آباد یونائیٹڈ کے کپتان شاداب خان نے کہا کہ امید ہے شائقین کو پی ایس ایل میں اچھی کرکٹ دیکھنے کو ملے گی۔