کینبرا(نمائندہ خصوصی)آسٹریلیا نے بچوں کی آن لائن حفاظت کیلئے تاریخی قدم اٹھاتے ہوئے اعلان کیا ہے کہ 16 سال سے کم عمر افراد پر سوشل میڈیا پلیٹ فارمز پر اکاؤنٹ بنانے پر مکمل پابندی عائد کر دی جائے گی۔ یہ پابندی دسمبر 2025 سے نافذ العمل ہوگی، اور خلاف ورزی کی صورت میں بھاری جرمانے عائد کیے جائیں گے۔
تفصیلات کے مطابق، آسٹریلوی وزیراعظم اینتھنی البانیز نے ایک پریس کانفرنس میں اس فیصلے کا اعلان کرتے ہوئے کہا”سوشل میڈیا کی دنیا ہمارے بچوں کیلئے نقصان دہ ثابت ہو رہی ہے۔ ہم جانتے ہیں کہ یہ ایک دن میں حل ہونے والا مسئلہ نہیں، لیکن ہمیں کسی نہ کسی دن آغاز کرنا ہوگا — اور وہ دن آج ہے۔”
وزیراعظم نے اعتراف کیا کہ سوشل میڈیا پلیٹ فارمز بچوں کی ذہنی صحت، تعلیمی کارکردگی اور سماجی رویوں پر منفی اثر ڈال رہے ہیں۔ انہوں نے کہا کہ حکومت اس قانون کے ذریعے بچوں کو اس خطرناک ڈیجیٹل ماحول سے بچانے کی کوشش کر رہی ہے۔
تمام سوشل میڈیا کمپنیوں کو پابند کیا جائے گا کہ وہ صارف کی عمر کی تصدیق کیلئےمؤثر نظام متعارف کرائیں۔16 سال سے کم عمر افراد کے سوشل میڈیا اکاؤنٹس پر مکمل پابندی ہوگی، خواہ والدین کی اجازت ہو یا نہ ہو۔
خلاف ورزی کی صورت میں کمپنیوں کو بھاری جرمانے کا سامنا کرنا پڑے گا جس کی تفصیلات آئندہ چند ماہ میں جاری کی جائیں گی۔آسٹریلوی حکومت نے ماہرین تعلیم، ذہنی صحت کے ماہرین، والدین اور تعلیمی اداروں سے بھی اس قانون سازی کے عمل میں مشاورت کی، تاکہ بچوں کیلئے محفوظ آن لائن مستقبل کو یقینی بنایا جا سکے۔
یہ فیصلہ دنیا بھر میں بچوں کی آن لائن حفاظت سے متعلق پالیسی سازی کیلئے ایک مثال بن سکتا ہے۔ حکومت آسٹریلیا کا کہنا ہے کہ وہ سوشل میڈیا کے فوائد سے انکار نہیں کرتی مگر بچوں کے تحفظ کو اولین ترجیح دیتی ہے۔
