گلاسگو (نمائندہ خصوصی)ایزی جیٹ کی ایک پرواز کے دوران اُس وقت خوف و ہراس پھیل گیا جب ایک مسافر نے چیختے ہوئے دعویٰ کیا کہ اس کے پاس بم ہے۔ تاہم پرواز میں موجود بہادر مسافروں نے فوری طور پر کارروائی کرتے ہوئے اس شخص کو قابو کر لیا۔ واقعے کے بعد اُسے گرفتار کر کے عدالت میں پیش کر دیا گیا۔
مسافر نے بم کی جھوٹی دھمکی دی اور دعویٰ کیا کہ وہ یہ سب ڈونلڈ ٹرمپ کو “ایک پیغام دینے” کیلئے کر رہا ہے۔ گلاسگو میں اُس پر فردِ جرم عائد کر دی گئی ہے۔
یہ واقعہ اس وقت پیش آیا جب ایزی جیٹ کی پرواز معمول کے مطابق سفر کر رہی تھی کہ ایک شخص نے بلند آواز میں دعویٰ کیا کہ اس کے پاس بم موجود ہے۔ اس غیر متوقع اعلان سے مسافروں میں شدید خوف پھیل گیا۔ تاہم کچھ بہادر مسافروں اور عملے نے صورتحال پر قابو پاتے ہوئے مذکورہ شخص کو فوری طور پر زیر کر لیا۔
گرفتاری کے بعد ابتدائی تفتیش میں ملزم نے کہا کہ وہ یہ سب “سابق امریکی صدر ڈونلڈ ٹرمپ کو پیغام پہنچانے کیلئےکر رہا تھا”۔اس واقعے کے بعد مذکورہ شخص پر عوامی تحفظ کو خطرے میں ڈالنے اور جھوٹی بم دھمکی دینے جیسے الزامات کے تحت فردِ جرم عائد کی گئی۔ آج اُسے گلاسگو کی ایک عدالت میں پیش کیا گیا، جہاں مقدمے کی ابتدائی سماعت ہوئی۔
حکام کا کہنا ہے کہ واقعے میں کوئی جانی نقصان نہیں ہوا اور پرواز کو محفوظ طریقے سے منزل تک پہنچا دیا گیا۔ عدالت نے ملزم کی ذہنی صحت کا جائزہ لینے کیلئےمزید رپورٹ طلب کر لی ہے، جبکہ کیس کی مکمل تحقیقات جاری ہیں۔
