پشاور(بیورورپورٹ)خیبرپختونخوا حکومت نے کہا ہے کہ بنوں حملے میں جانی نقصان مسجد کی چھت گرنے سے ہواہے۔وزیراعلیٰ کے پی کے علی امین گنڈا پور نے بنوں میں دھماکے کی مذمت کرتے ہوئے اعلیٰ حکام سے تفصیلی رپورٹ طلب کرلی۔
انہوں نے جانی نقصان پر گہرے دکھ کا اظہار کرتے ہوئے شہداء کے لواحقین سے تعزیت کا اظہار کیا اور ان کے درجات کی بلندی اور سوگواران کیلئے صبر جمیل کی دعا کی۔گنڈا پور نے رمضان کے مقدس مہینے میں ایسے واقعات کو انتہائی قابل مذمت اور افسوسناک قرار دیا۔
کے پی کے مشیر برائے اطلاعات بیرسٹر سیف نے کہا کہ بنوں چھاؤنی میں دہشت گردانہ حملے اور اس کے بعد ہونے والے دھماکوں سے قریبی عمارتوں کی چھتیں گر گئیں۔ انہوں نے مزید کہا کہ سیکورٹی فورسز نے تمام حملہ آوروں کو کامیابی سے ختم کر دیا، مزید نقصان کو روک دیا۔
بیرسٹر سیف نے تصدیق کی کہ جانی نقصان اس وقت ہوا جب دھماکوں کی وجہ سے قریبی مسجد کی چھت گر گئی۔ انہوں نے اس واقعے کو انتہائی افسوسناک قرار دیا اور ریاست کے دشمنوں کو ناکام بنانے کیلئےحکومت کے عزم کا اعادہ کیا۔
