دبئی:پاکستان نے بیس بال یونائیٹڈ عرب کلاسک میں شاندار کارکردگی کا سلسلہ جاری رکھتے ہوئے بھارت کو 0-12 سے آوٹ کلاس کرکے مسلسل تیسری کامیابی حاصل کرلی۔اس کامیابی کے ساتھ ہی پاکستان نے ٹورنامنٹ کے ناک آؤٹ مرحلے میں رسائی حاصل کرلی ہے۔
پاکستانی ٹیم نے بھارت کو کھیل کے کسی بھی لمحے میں سنبھلنے کا چانس اور ہوم رن اسکور کرنے کا موقع نہ دیا۔پاکستان نے دوسری، چوتھی اور پانچویں اننگز میں ہوم رنز اسکور کرکے برتری کو مستحکم کیا اور بھارتی ٹیم کے خلاف اپنی گرفت مضبوط رکھی۔
میچ میں مجموعی طور پر پاکستان کے تمام کھلاڑیوں نے شاندار کارکردگی کا مظاہرہ کیا، خاص طور پر پیئرس رومیل خان، محمد یونس، زین شریف، جبران مرتضی اور محمد حسین نے جیت میں نمایاں کردار ادا کیا۔پاکستانی پچر فیصل حیات نے بھارتی کھلاڑیوں کو دباؤ میں رکھا، جس کی وجہ سے بھارتی ہٹرز مشکلات کا شکار رہے۔
پاکستانی ٹیم اپنا آخری گروپ میچ کل افغانستان کے خلاف کھیلے گی، مسلسل تین فتوحات کے بعد پاکستان کی براہ راست سیمی فائنل تک رسائی کے امکانات روشن ہیں۔ٹورنامنٹ میں پاکستان سمیت 9 ٹیمیں حصہ لے رہی ہیں.ٹورنامنٹ میں حصہ لینے والی ٹیموں میں پاکستان ،بھارت ،یواے ای،سعودی عرب،نیپال ،بنگلہ دیش ،فلسطین، افغانستان کی ٹیمیں شامل ہیں.
