مسی ساگا(اشرف خان لودھی سے ) پاکستانی نژادکینیڈینز نے ’’ICNA‘‘ریلیف کینیڈا کے تعاون سے خیبرپختونخواہ میں سیلاب متاثرین کیلئے امدادی رقوم جمع کرنے کیلئے تقریب کاانعقادکیا۔پاکستانی کیمونٹی کی نمائندگی ڈکسی الیکٹرونکس اینڈایمپلائنسزکے سلیم چودھری ، تاج خان ،محبوب شیخ ، مرتضیٰ جوئیہ ،حافظ خالد ، خالدعثمان اورمعروف گائیک رحیم شاہ نے کی ۔
شرکامیں کینیڈین سینیٹرسلمیٰ عطااللہ جان ،ہائی کمشنرمحمدسلیم ،قونصل جنرل ٹورنٹوخلیل احمدباجوہ ، MPشفقت علی (صدرخزانہ بورڈکینیڈا)،MP اقراخالد ،MP رانااسلم ،میئربرامپٹن پیٹرک براؤن،حفیظ خان ،نسیم بیگ ، محمداسحاق ،عارف شیخ ،کرنل یحییٰ ، شعیب خان ، راحیل الحق ،شمس الرحمان،’’APNA‘‘کینیڈاکے صدرڈاکٹرنوشاد نورانی، سیکرٹری ڈاکٹر رازی سید، ڈاکٹرافروز، ڈاکٹر ارشدمحمود ،ڈاکٹرحمیراحلیم ،ڈاکٹرکلیم اور ’’ICNA‘‘کی طرف سے رئیس خان شامل تھے ۔
کینیڈین پاکستانیوں کے تعاون سے خیبر پختونخوا، پاکستان کے سیلاب زدگان کی بحالی کیلئے ایک کامیاب فنڈ ریزنگ تقریب کا انعقاد کیا۔ ’’تباہی سے امید تک، زندگیوں کی بحالی میں ہمارا ساتھ دیں‘‘کے عنوان سے منعقدہ اس تقریب کا مقصد حالیہ سیلاب سے متاثر ہونے والے ہزاروں خاندانوں کیلئے فوری امداد اور بحالی کیلئے فنڈز اکٹھا کرنا تھا۔
مذکورہ تقریب مسی ساگا کے کیپٹل بینکوئٹ ہال میں منعقد ہوئی۔ شرکاء نے پاکستان میں اپنے بھائیوں اور بہنوں کے ساتھ بھرپور یکجہتی کا اظہار کیا اور دل کھول کر عطیات دئیے۔اس موقع پر’’ICNA‘‘ ریلیف کینیڈا کے ترجمان رئیس خان نے کہا، ’’ہم کمیونٹی کے ہر فرد کے بے حد مشکور ہیں جنہوں نے اس مشکل وقت میں خیبر پختونخوا کے سیلاب متاثرین کیلئےاپنا دستِ تعاون دراز کیا۔
آپ کے عطیات سے نہ صرف متاثرین کو خوراک، پناہ گاہ اور طبی امداد فراہم کی جائے گی بلکہ انہیں اپنی زندگیاں دوبارہ شروع کرنے کی امید بھی ملے گی۔‘‘انہوں نے مزید کہا کہ’’ICNA‘‘ریلیف کی ٹیمیں پاکستان میں سیلاب سے متاثرہ علاقوں میں امدادی کارروائیوں میں مصروف ہیں اور جمع ہونے والی رقم کو شفاف طریقے سے مستحقین تک پہنچایا جائیگا۔
تقریب میں شرکت نہ کر سکنے والے افراد کیلئے عطیات کے دروازے اب بھی کھلے ہیں۔ ’’ICNA‘‘ریلیف کینیڈا نے اپیل کی ہے کہ زیادہ سے زیادہ لوگ اس نیک کام میں حصہ ڈالیں۔ تمام عطیات زکوٰۃ کیلئے اہل ہیں اور تنظیم کی جانب سے باقاعدہ ٹیکس رسیدیں بھی جاری کی جائیں گی۔
عطیات آن لائن درج ذیل ویب سائٹ پر دیے جا سکتے ہیں:www.icnareliefcanada.ca
’’ICNA‘‘ریلیف کینیڈا ایک رجسٹرڈ خیراتی ادارہ ہے جو دنیا بھر میں قدرتی آفات اور بحرانوں سے متاثرہ افراد کو انسانی امداد فراہم کرتا ہے۔ تنظیم ’’سرحدوں کے بغیر، کوئی پابندی نہیں‘‘کے نصب العین کے تحت کام کرتی ہے۔
