راولپنڈی(نمائندہ خصوصی)راولپنڈی میں کھیلے گئے دوسرے اور فیصلہ کن ٹیسٹ میچ میں جنوبی افریقہ نے پاکستان کو 8 وکٹوں سے شکست دے کر دو میچوں کی سیریز 1-1 سے برابر کر دی۔ قومی ٹیم دوسری اننگز میں محض 138 رنز پر آؤٹ ہوگئی، جس کے بعد مہمان ٹیم نے 68 رنز کا آسان ہدف صرف دو وکٹوں کے نقصان پر حاصل کرلیا۔ کیشو مہاراج کو شاندار باؤلنگ پر میچ جبکہ سینوران متھوسوامے کو سیریز کا بہترین کھلاڑی قرار دیا گیا۔
پاکستانی ٹیم نے چوتھے روز اپنی دوسری اننگز کا آغاز 94 رنز چار کھلاڑی آؤٹ سے کیا، تاہم باقی کھلاڑی زیادہ دیر کریز پر نہ ٹک سکے۔ کپتان بابر اعظم نے نصف سنچری مکمل کرنے کے بعد 51 رنز بنا کر سائمن ہرمر کی گیند پر ایل بی ڈبلیو آؤٹ ہوئے۔ ان کے بعد محمد رضوان 18 رنز بنا کر، جبکہ نعمان علی اور شاہین شاہ آفریدی بغیر کوئی رن بنائے پویلین لوٹ گئے۔
سلمان علی آغا نے 28 رنز اور ساجد خان نے 13 رنز بنائے، تاہم دونوں کھلاڑی کیشو مہاراج کی گیندوں پر آؤٹ ہوئے۔ پاکستان کی پوری ٹیم دوسری اننگز میں 138 رنز پر ڈھیر ہوگئی۔
جنوبی افریقہ کی جانب سے سائمن ہرمر نے 6، کیشو مہاراج نے 2 جبکہ کگیسو ربادا نے ایک وکٹ حاصل کی۔
“جنوبی افریقہ کی دوسری اننگز”
68 رنز کے آسان ہدف کے تعاقب میں جنوبی افریقہ نے جارحانہ آغاز کیا۔ اوپنر ایڈن مارکرم نے 45 گیندوں پر 8 چوکوں کی مدد سے 42 رنز بنائے اور نعمان علی کی گیند پر ایل بی ڈبلیو آؤٹ ہوئے۔ ٹرسٹن اسٹربز کھاتہ کھولے بغیر آؤٹ ہوئے، تاہم ریان ریکلٹن نے 25 رنز کی ناقابلِ شکست اننگز کھیل کر ٹیم کو فتح سے ہمکنار کیا۔
“جنوبی افریقہ کی پہلی اننگز”
مہمان ٹیم نے پاکستان کے 333 رنز کے جواب میں 404 رنز بنائے تھے۔ ٹرسٹن اسٹربز، ٹونی ڈی زورزی، سینوران متھوسوامے اور کگیسو ربادا نے نصف سنچریاں اسکور کیں۔ اس طرح جنوبی افریقہ کو پہلی اننگز میں 71 رنز کی برتری حاصل ہوئی۔ پاکستان کی جانب سے ڈیبیو کرنے والے فیصل نے 6 وکٹیں حاصل کیں، نعمان علی نے 2 جبکہ شاہین شاہ آفریدی اور ساجد خان نے ایک ایک وکٹ لی۔
“پاکستان کی پہلی اننگز”
پاکستان نے پہلی اننگز میں 333 رنز اسکور کیے، جن میں عبداللہ شفیق، شان مسعود اور سعود شکیل کی نصف سنچریاں نمایاں رہیں، جبکہ سلمان علی آغا نے 45 رنز بنائے۔ جنوبی افریقہ کے اسپنر کیشو مہاراج نے 7، سائمن ہرمر نے 2 اور کگیسو ربادا نے ایک وکٹ حاصل کی۔
“سیریز کا پس منظر”
یاد رہے کہ سیریز کے پہلے ٹیسٹ میچ میں پاکستان نے جنوبی افریقہ کو 93 رنز سے شکست دے کر برتری حاصل کی تھی، تاہم راولپنڈی ٹیسٹ میں جنوبی افریقہ نے شاندار کم بیک کرتے ہوئے سیریز برابر کر دی۔
