سئول: جنوبی کوریا نے اپنے صدر پر بیرون ملک سفر پر پابندی لگا دی۔
غیر ملکی میڈیا رپورٹس کے مطابق جنوبی کوریا کے صدر یون سک یول پر مارشل لا لگانے کی ناکام کوشش پر ملک چھوڑنے پر پابندی عائد کر دی گئی ہے، جنوبی کوریا میں قیادت کا بحران گہرا ہوتا جا رہا ہے اور صدر سے استعفے کے مطالبات بڑھتے جا رہے ہیں۔
وزارت انصاف کے حکام نے بتایا کہ مارشل لانافذ کرنے پر صدر یون سک یول پر غیر ملکی سفر پر پابندی لگانے کا فیصلہ کیا گیا، جس پر فوری عمل درآمد کر دیا گیا ہے۔
حکمران پارٹی پی پی پی نے صدر یون سک یول سے خارجہ اور دیگر ریاستی امور کے اختیارات چھین کر وزیر اعظم کو تفویض کر دیے ہیں، کورین صدر کے خلاف غیر آئینی اقدام پر اپوزیشن اور عوام کی جانب سے مستعفی ہونے کے لیے دباؤ بڑھتا جا رہا ہے۔
ہفتے کے روز صدر کے مواخذے کے لیے ووٹنگ ہو رہی تھی تاہم یون کی پیپلز پاور پارٹی (پی پی پی) نے ووٹنگ سے قبل چیمبر سے واک آؤٹ کر لیا، تحریک ناکام ہونے کے بعد ان پر بغاوت کے ساتھی ہونے کا الزام لگایا گیا۔
پارٹی کے رہنما ہان ڈونگ ہون نے کہا کہ یون کو خارجہ اور دیگر ریاستی امور سے باہر رکھا جائے گا، اور وزیر اعظم ہان ڈک سو اس وقت تک حکومتی امور کو دیکھیں گے جب تک یون آخر کار ایک طرف نہیں ہٹ جاتے۔ صدارتی اختیار وزیر اعظم کو سونپنے کے فیصلے نے ایشیا کی چوتھی بڑی معیشت کو آئینی بحران میں دھکیل دیا ہے۔
