لاہور(سپورٹس ڈیسک) پاکستان کرکٹ بورڈ کے ڈائریکٹر ہائی پرفارمنس عاقب جاوید مختصر دورۂ لندن کے بعد لاہور پہنچ گئے، جہاں وہ پی سی بی کے اہم عہدیدار کی حیثیت سے اپنی ذمہ داریاں بدستور انجام دیتے رہیں گے۔
عاقب جاوید لارڈز ٹیسٹ میں پاکستان کی انگلینڈ کے ہاتھوں 194 رنز سے شکست کے بعد لندن گئے تھے، جہاں انہوں نے قومی ٹیم کے ہمراہ 2 ستمبر کو بکنگھم پیلس میں کنگ چارلس کی جانب سے دیے گئے عشائیے میں شرکت کی تھی۔
ذرائع کے مطابق عاقب جاوید نے لندن میں چیئرمین پی سی بی کے ساتھ ہونے والے اہم اجلاس میں بھی شرکت کی، جبکہ دورۂ انگلینڈ کی ٹیسٹ ٹیم سے متعلق سلیکشن کمیٹی کو بورڈ کی جانب سے بھیجے گئے وضاحتی خط پر اپنا موقف بھی پیش کر دیا ہے۔
لارڈز ٹیسٹ میں شکست کے بعد ہیڈ کوچ سرفراز احمد، بولنگ کوچ عمر گل اور 7 کھلاڑیوں کو ٹیم سے باہر کرنے جبکہ پاکستان سے مزید 6 کھلاڑیوں کو طلب کرنے کے فیصلے پر پی سی بی اور خصوصاً عاقب جاوید کو سابق کرکٹرز اور کرکٹ حلقوں کی جانب سے شدید تنقید کا سامنا ہے۔ بعض حلقوں کی جانب سے ان کے استعفے کا مطالبہ بھی کیا جا رہا ہے۔
تاہم پی سی بی کے باخبر ذرائع نے واضح کیا ہے کہ پاکستان کرکٹ کے اہم فیصلوں میں مرکزی کردار ادا کرنے والے عاقب جاوید اپنے عہدے پر برقرار ہیں اور بورڈ کی جانب سے تفویض کردہ ذمہ داریاں انجام دے رہے ہیں۔عاقب جاوید پاکستان کی 1992ء ورلڈ کپ فاتح ٹیم کے رکن بھی رہے ہیں۔ انہوں نے 1988ء سے 1998ء تک قومی ٹیم کی نمائندگی کرتے ہوئے ٹیسٹ کرکٹ میں 54 جبکہ ون ڈے انٹرنیشنل میں 182 وکٹیں حاصل کیں۔
