کیلگری (CTV نیوز/گلوبل نیوز/CBC) پیر کی شام کیلگری کے جنوب مشرقی علاقے نیو برائٹن میں آگ لگنے کے نتیجے میں دو درجن سے زائد رہائشی اپنے گھروں سے بے گھر ہوگئے۔
کیلگری فائر ڈیپارٹمنٹ (CFD) کے مطابق، آگ لگنے کی اطلاع نیو برائٹن پارک SE کی ایک عمارت سے ملی۔ اطلاع ملتے ہی دوسرا الارم بجایا گیا تاکہ اضافی وسائل بروئے کار لائے جا سکیں۔ فائر فائٹرز جب موقع پر پہنچے تو تین دو منزلہ گھروں سے شدید دھواں اور شعلے اٹھ رہے تھے۔
سی ایف ڈی کے پبلک انفارمیشن آفیسر الیکس کوان نے بتایا کہ ابتدائی اندازوں کے مطابق آگ وسط والے گھر کے گیراج سے شروع ہوئی اور جلد ہی پڑوسی گھروں اور گیراج تک پھیل گئی۔ دونوں اطراف کے گھروں کے علاوہ پچھلی گلی میں واقع کنڈو یونٹس کو بھی حرارتی نقصان پہنچا۔
آگ پر قابو پانے کے لیے دو واٹر ٹاورز استعمال کیے گئے۔ تین گھروں کو آگ، دھوئیں اور پانی کی وجہ سے شدید نقصان پہنچا جبکہ دو قریبی گھروں کو درمیانہ نقصان ہوا۔ آگ بجھانے کے بعد گیس لیک کا بھی پتا چلا جس کے بعد علاقے کے تمام رہائشیوں کو فوری طور پر باہر نکال لیا گیا۔
حکام کے مطابق 21 رہائشی خود بخود محفوظ مقام پر منتقل ہوگئے تھے۔ دو پالتو کتوں کو بھی محفوظ نکالا گیا جو فی الحال اپنے خاندان کے پاس ہیں۔ ایک شخص کو دھوئیں کے اثرات کے باعث پیرامیڈکس نے موقع پر طبی امداد دی تاہم ہسپتال منتقل کرنے کی ضرورت پیش نہ آئی۔سی ایف ڈی نے بتایا کہ متاثرہ رہائشیوں کو کچھ وقت کیلئے بے گھر رہنا پڑے گا۔ آگ لگنے کی وجہ جاننے کیلئے تحقیقات جاری ہیں۔
