ممبئی (خبر ایجنسیاں)حال ہی میں فلم ساز کرن جوہر کے پروگرام ’’کافی ود کرن‘‘ کے نویں سیزن کی افتتاحی قسط میں گفتگو کرتے ہوئے سلمان خان نے اپنی جوانی کا یہ واقعہ بیان کیا۔ اس موقع پر کرن جوہر نے ممبئی میں ان کے گھر گلیکسی اپارٹمنٹس کے دورے کی یادیں بھی تازہ کیں۔
سلمان خان نے بتایا کہ وہ اپنے بیڈروم میں کبھی اکیلے نہیں سوتے تھے، کیونکہ انہیں کسی ایسی موجودگی کا احساس ہوتا تھا جسے انہوں نے کبھی دیکھا نہیں، صرف اس کی آہٹ سنی اور موجودگی محسوس کی تھی۔ ان کے مطابق جب بھی وہ کمرے سے باہر نکلتے تو روشنیاں جھلملا اٹھتیں، الماریاں خودبخود کھل جاتیں اور موسیقی کا نظام بھی خود چلنے لگتا تھا۔
اداکار نے مزید بتایا کہ غسل خانے میں ہوتے ہوئے بھی انہیں باہر کسی کی موجودگی محسوس ہوتی، جیسے کوئی الماریوں کے ساتھ چھیڑ چھاڑ کر رہا ہو۔ ان واقعات سے انہیں یہ احساس ہوا کہ کمرے میں کوئی شخص یا کوئی اور چیز موجود تھی، تاہم وہ اس کی حقیقت نہیں جان سکے۔
کرن جوہر نے جب پوچھا کہ کیا سلمان خان اس کمرے کو آسیب زدہ سمجھتے تھے تو اداکار نے وضاحت کی کہ وہ اسے بھوت پریت کا معاملہ قرار نہیں دیتے، بلکہ انہیں صرف کسی غیر مرئی موجودگی کا احساس ہوتا تھا۔
سلمان خان نے بتایا کہ اس تجربے کے باوجود وہ کبھی خوف زدہ نہیں ہوئے، کیونکہ اس نامعلوم موجودگی نے انہیں کبھی نقصان نہیں پہنچایا۔ انہوں نے یہ بھی بتایا کہ موسیقی چلاتے وقت انہیں اکثر اپنے پیچھے کسی کی موجودگی محسوس ہوتی تھی اور وہ موسیقی چلا کر کمرے سے باہر نکل جاتے تھے۔
