دبئی میں کھیلے جا رہے انڈر 19 ایشیا کپ کے پہلے سیمی فائنل میں بنگلہ دیش نے پاکستان کو 7 وکٹوں سے ہرا کر فائنل کے لیے کوالیفائی کر لیا۔
دبئی میں کھیلے جا رہے انڈر 19 ایشیا کپ کے پہلے سیمی فائنل میں پاکستان کی بیٹنگ لائن بنگلہ دیش کے سامنے فلاپ ہو گئی اور پوری ٹیم 116 رنز پر آؤٹ ہوگئی۔
گرین شرٹس کی جانب سے دیا گیا 117 رنز کا معمولی ہدف بنگال ٹائیگرز نے 23 ویں اوورز میں تین وکٹوں کے نقصان پر حاصل کر لیا۔
بنگلہ دیشی کپتان نے ناقابل شکست 61 رنز کی اننگ کھیلی۔ محمد شہاب نے 26 اور زواد ابرار نے 17 رنز اسکور کیے۔
پاکستان کی جانب سے نوید احمد، عبدالسبحان اور علی رضا نے ایک، ایک وکٹ حاصل کی۔
اس سے قبل بنگلہ دیش کی ٹیم نے ٹاس جیت کر پہلے بولرز کو آزمانے کا فیصلہ کیا اور یہ فیصلہ درست ثابت ہوا۔ گرین شرٹس پورے 50 اوورز بھی نہ کھیل سکی اور صرف 37 اوورز میں پوری ٹیم 116 رنز پر ڈھیر ہوگئی۔
پاکستان کو کوئی بھی بلے باز بنگلہ دیشی بولرز کا سامنا نہ کرسکا۔ دونوں اوپنرز بغیر کوئی رن بنائے پویلین لوٹے۔ گرین شرٹس کے چار کھلاڑی صفر پر آؤٹ ہوئے۔
گرین شرٹس کی جانب سے فرحان یوسف 32 رنز بنا کر ٹاپ اسکورر رہے۔ محمد ریاض اللہ 28 اور کپتان سعد بیگ 18 رنز بنا کر آؤٹ ہوئے۔
بنگلہ دیش کی جانب سے سب سے کامیاب بولر اقبال حسین رہے جنہوں نے سات اوورز میں 24 رنز دے کر چار کھلاڑیوں کو آؤٹ کیا۔ معروف ماریدھا نے دو، الفہد اور دیباشش نے ایک، ایک وکٹ حاصل کی۔
دوسرے سیمی فائنل میں بھارت نے سری لنکا کو سات وکٹوں سے ہرا دیا۔ سری لنکا نے پہلے بیٹنگ کرتے ہوئے 173 رنز بنائے۔ بھارت نے 174 رنز کا ہدف تین وکٹیں گنوا کر حاصل کر لیا۔
بھارت اور بنگلہ دیش کے درمیان ٹورنامنٹ کا فائنل اتوار 8 دسمبر کو دبئی میں کھیلا جائے گا۔
