ٹورنٹو (نمائندہ خصوصی) اونٹاریو لبرل پارٹی (OLP) نے اپنے نئے لیڈر کے انتخاب کیلئے اراکین سے مشاورت کا باضابطہ آغاز کر دیا ہے۔ بونی کرومبی کے مستعفی ہونے کے بعد پارٹی کی لیڈرشپ ووٹ کمیٹی کو تشکیل دیا گیا ہے، جو اراکین سے تجاویز اور آراء اکٹھی کر کے انہیں ایگزیکٹو کونسل کے سامنے پیش کرے گی۔
پارٹی کے مطابق، اراکین کی رائے جاننے کیلئے ایک آن لائن سروے تیار کیا گیا ہے جو ستمبر 2025 کے اواخر میں متعارف کرایا گیا۔ اس سروے کا مقصد پارٹی اراکین سے براہِ راست فیڈبیک حاصل کرنا ہے تاکہ آئندہ لیڈرشپ ووٹنگ کو زیادہ منصفانہ، شفاف اور قابلِ رسائی بنایا جا سکے۔
دلچسپی رکھنے والے اراکین اپنے خیالات پارٹی کی ای میل info@ontarioliberal.ca پر بھی بھیج سکتے ہیں۔پارٹی کے ذرائع کے مطابق، کمیٹی اس وقت مشاورت کے ابتدائی مرحلے میں ہے، جس کے بعد حتمی سفارشات تیار کر کے انتخابی قواعد اور شیڈول طے کیے جائیں گے۔
پچھلے انتخاب میں، جو 2023 میں ہوا تھا، پارٹی نے تمام اراکین کے براہِ راست ووٹ کے ذریعے رینکڈ بیلٹ سسٹم اپنایا تھا۔ اس بات کا فی الحال فیصلہ نہیں کیا گیا کہ آئندہ انتخاب میں بھی یہی طریقہ استعمال ہوگا یا نیا نظام نافذ کیا جائے گا۔پارٹی کا کہنا ہے کہ اراکین کی رائے نئی قیادت کے انتخابی ڈھانچے کی بنیاد بنے گی اور تمام فیصلے مشاورت اور شفافیت کے اصولوں کے تحت کیے جائیں گے۔
