افغانستان نے ہیڈ کوچ جوناتھن ٹراٹ کے معاہدے میں توسیع کردی۔
افغانستان کرکٹ بورڈ کے مطابق ہیڈکوچ جوناتھن ٹراٹ کے معاہدے میں 2025 کے اختتام تک توسیع کی گئی ہے۔ جوناتھن ٹراٹ کی ڈھائی سالہ کوچنگ میں افغان ٹیم نےکافی ترقی کی ہے۔
بورڈ نے ہیڈکوچ کی کارکردگی کو سراہتے ہوئے کہا ہے کہ یہ فیصلہ ان کے ڈھائی سالہ کامیاب دور کے بعد آیا ہے جس کے دوران انہوں نے ٹیم کی ترقی میں اہم کردار ادا کیا۔
افغانستان کی قومی ٹیم نے گزشتہ دو سالوں میں شاندار کامیابیاں حاصل کیں اور ٹراٹ ان کامیابیوں کا حصہ تھا، خاص طور پر ICC ODI کرکٹ ورلڈ کپ کے دوران، جہاں افغانستان نے مضبوط حریفوں جیسے کہ انگلینڈ، پاکستان، سری لنکا، اور ہالینڈ کے خلاف شاندار فتوحات حاصل کیں۔
ان کامیابیوں کے نتیجے میں افغان ٹیم نے ایونٹ میں ٹاپ آٹھ ٹیموں میں جگہ بنائی، جس نے افغانستان کو 2025 میں اپنے پہلے آئی سی سی چیمپئنز ٹرافی ایونٹ کے لیے کوالیفائی کرنے کا موقع دیا۔
