دنیا کے پہلے خلانورد یوری گاگارین کی یادگار کی اسلام آباد میں نقاب کشائی کی گئی۔اسلام آباد کے سیکٹر ایف-9، فاطمہ جناح پارک میں پہلے خلانورد یوری گاگارین کی یادگار کی نقاب کشائی کی تقریب منعقد ہوئی۔ اس موقع پر روس کے وزیرِ توانائی سرگئی تسویلییف ، پاکستان کے وزیرِ توانائی سردار اویس احمد خان لغاری، اسلام آباد میں روس کے سفیر البرٹ خوریف اور روسی پائلٹ۔خلانورد اور روسی فیڈریشن کی ہیرو، ایلینا سیرووا سمیت دیگر معززین بھی موجود تھے۔
سرگئی تسویلییف: “یہ ہماری مشترکہ تاریخ کے عظیم ترین کارناموں میں سے ایک ہے۔ خلائی تحقیق کے شعبے میں بے شمار سائنس دان مصروفِ عمل ہیں۔ میری خواہش ہے کہ یہ کام دنیا کے تمام ممالک کے لیے فائدہ مند ثابت ہو۔” تقریب سے خطاب میں سرگئی تسویلییف نے خلائی تحقیق کی عالمی اہمیت پر زور دیتے ہوئے بتایا کہ آئندہ سال اسلام آباد میں روس اور پاکستان کے مابین خلانوردی اور خلائی ٹیکنالوجی کے بنیادی ڈھانچے کی بہتری کے موضوع پر ایک کانفرنس منعقد کی جائے گی۔
یہ تقریب روس اور پاکستان کے بین الحکومتی کمیشن برائے تجارت، اقتصادی اور سائنسی و تکنیکی تعاون کے دسویں اجلاس کے موقع پر منعقد ہوئی، جس کا اہتمام 25 تا 27 نومبر 2025 کو اسلام آباد میں کیا گیا تھا۔ اسلام آباد میں روسی سفارت خانے نے یوری گاگارین کی یادگار پر نصب کرنے کے لیے مجسمہ فراہم کرنے پر بین الاقوامی عوامی فلاحی فنڈ “ثقافتوں کا مکالمہ — ایک متحدہ دنیا”، یادگار کی تنصیب میں تعاون پر سینٹ پیٹرزبرگ بین الاقوامی مرکنٹائل ایکسچینج اور اس منصوبے پر عمل درآمد میں معاونت پر پاکستانی حکام کا شکریہ ادا کیا۔
