غزہ(ایجنسیاں)شدید سردی اور سیلابی حالات غزہ میں بے گھر فلسطینیوں کی مشکلات میں اضافہ کر رہے ہیں۔ سول ڈیفنس ایجنسی کے مطابق شدید سردی اور بارش کے باعث اب تک 17 شہری ہلاک ہو چکے ہیں، جن میں چار بچے بھی شامل ہیں۔
عالمی امدادی اداروں نے خبردار کیا ہے کہ اسرائیلی پابندیاں محصور علاقے میں جان بچانے والی عارضی رہائش اور امدادی سامان کی ترسیل میں رکاوٹ بن رہی ہیں۔ غزہ میں تقریباً دس لاکھ افراد ایسے خیموں میں رہ رہے ہیں جو سخت موسمی حالات کا مقابلہ کرنے کے لیے محفوظ نہیں۔
یونیسف نے کہا کہ شدید بارش اور تیز ہواؤں نے پہلے ہی مشکل حالات کو مزید خراب کر دیا ہے، اور عارضی خیموں میں رہنے والے لاکھوں بچے جان لیوا بیماریوں کے خطرے سے دوچار ہیں۔ سول ڈیفنس نے عالمی برادری سے فوری امداد اور کارروائی کی اپیل کی ہے، کیونکہ سیلابی پانی نے رہائشی خیموں کو ڈبو دیا ہے اور انسانی تکالیف میں اضافہ ہو گیا ہے۔
