واشنگٹن (نمائندہ خصوصی+ایجنسیاں) امریکی دارالحکومت میں نیشنل گارڈ کے اہلکاروں پر حملے سے ایک روز قبل ٹیکساس کے شہر فورٹ ورتھ میں ایک افغان شہری کو عمارت دھماکے سے اُڑانے کی دھمکی دینے پر گرفتار کر لیا گیا۔ حکام کے مطابق گرفتار شخص محمد داؤد الکزئی ’آپریشن الائیز ویلکم‘ کے تحت امریکا میں داخل ہوا تھا۔
ڈپارٹمنٹ آف ہوم لینڈ سیکیورٹی کی اسسٹنٹ سیکریٹری ٹریشا میک لافلِن نے بتایا کہ مشتبہ شخص نے ٹک ٹاک پر ویڈیو اپ لوڈ کی، جس میں وہ مبینہ طور پر دھماکا خیز ڈیوائس تیار کرتا دکھائی دیا اور فورٹ ورتھ کو اپنا ممکنہ ہدف قرار دیا۔ اسے منگل کے روز ایف بی آئی اور ٹیکساس ڈپارٹمنٹ آف پبلک سیفٹی کی مشترکہ ٹیم نے گرفتار کیا۔
یہ گرفتاری واشنگٹن میں ایک اور افغان شہری رحمٰن اللہ لکانوال کی فائرنگ سے 24 گھنٹے قبل ہوئی، جس نے کیپٹل کے قریب گشت کے دوران 2 نیشنل گارڈ اہلکاروں کو زخمی کیا تھا۔ حکام نے اس فائرنگ کو دانستہ دہشت گردی کا عمل قرار دے کر ملزم کو حراست میں لیا۔
افغان شہریوں سے متعلق یہ مسلسل واقعات سابق صدر ڈونلڈ ٹرمپ کی نئی امیگریشن پالیسیوں میں فوری اقدامات کا باعث بن گئے ہیں۔ ٹرمپ پہلے ہی ’’ریورس مائیگریشن‘‘ پروگرام کا اعلان کر چکے ہیں، جس کے تحت ایسے تارکینِ وطن کو ملک بدر کیا جائے گا جو ’’ملک کے لیے فائدہ مند نہیں‘‘ سمجھे جاتے۔
انہوں نے وفاقی اداروں کو ہدایت کی ہے کہ ’آپریشن الائیز ویلکم‘ کے تحت داخل ہونے والے افغان شہریوں کی سخت نگرانی کی جائے اور ان کی حیثیت کا دوبارہ جائزہ لیا جائے۔ مزید سخت اقدامات بھی متوقع ہیں کیونکہ ایجنسیاں نئے آنے والوں کی اسکریننگ میں توسیع کر رہی ہیں۔
