صنعا (خبر ایجنسیاں، رائٹرز، اے پی) یمن کی انصار اللہ نے دعویٰ کیا ہے کہ گزشتہ 48 گھنٹوں کے دوران سعودی طیاروں نے یمن کے مختلف علاقوں پر 129 فضائی حملے کیے۔
انصار اللہ کے ترجمان یحییٰ سریع کے مطابق سعودی فضائی حملے تعز، مأرب، الحدیدہ، الجوف، صعدہ، عمران اور حجہ کے علاقوں میں کیے گئے۔ ان کا کہنا تھا کہ یہ حملے سعودی عرب کے خمیس مشیط اور طائف کے فوجی اڈوں سے اڑنے والے ایف 15 اور ٹائفون طیاروں کے ذریعے کیے گئے۔
انصار اللہ نے دھمکی دی ہے کہ سعودی حملوں کا جواب دیا جائے گا۔ ترجمان نے کہا کہ یمن کے خلاف کیے جانے والے یہ حملے بغیر جواب نہیں رہیں گے۔
دوسری جانب سعودی عرب یا اس کی جانب سے لڑنے والی یمنی حکومت نے انصار اللہ کے 129 فضائی حملوں کے دعوے کی آزادانہ طور پر تصدیق نہیں کی۔ رائٹرز کے مطابق یمن میں حوثیوں کی حالیہ پیش قدمی اور سعودی حمایت یافتہ فورسز کے ساتھ شدید لڑائی کے بعد سعودی فضائی حملوں میں بھی اضافہ ہوا ہے۔
یمن میں جاری کشیدگی کے دوران انصار اللہ نے سعودی حمایت یافتہ فورسز کے خلاف مختلف محاذوں پر لڑائی کی ویڈیوز بھی جاری کی ہیں۔ روسی میڈیا کے مطابق حوثیوں نے محاذ سے فرار ہونے والے افراد کو بھی نشانہ بنایا اور بعض گاڑیوں کو آگ لگا دی۔
حالیہ لڑائی نے یمن میں کئی برس سے جاری تنازع کو ایک بار پھر شدید کردیا ہے۔ عالمی ذرائع کے مطابق حوثیوں کی بحیرہ احمر کے ساحلی علاقوں میں پیش قدمی سے باب المندب کی اہم بحری گزرگاہ کو بھی خطرات لاحق ہوگئے ہیں، جس سے عالمی تجارت اور توانائی کی ترسیل پر مزید دباؤ بڑھنے کا خدشہ ہے۔
