اونٹاریو (نمائندہ خصوصی) اونٹاریو اسمبلی کے رکن ایم پی پی عدیل شمجی نے اسلامی ورثہ ماہ (Islamic Heritage Month) کے موقع پر اپنے پیغام میں کہا ہے کہ اکتوبر کا مہینہ مسلمانوں کی تاریخی، ثقافتی اور علمی خدمات کو سراہنے اور ان سے سیکھنے کا بہترین موقع فراہم کرتا ہے۔
انہوں نے کہا کہ وہ آج اپنے ساتھی ارکان ایم پی پی جوناتھن ساؤ (Don Valley North) اور ایم پی پی اسٹیفنی باؤمن (Don Valley West) کے ہمراہ اونٹاریو لبرل پارلیمانی رہنماؤں کی جانب سے مسلمانوں کو خراجِ تحسین پیش کرنے آئے ہیں۔
عدیل شمجی نے کہا کہ”اسلامی ورثہ ماہ ہمیں موقع دیتا ہے کہ ہم ان بیش بہا خدمات پر غور کریں جو مسلمانوں نے دنیا بھر میں فنون، سائنس، طب، فنِ تعمیر اور سیاست جیسے شعبوں میں انجام دی ہیں۔”
انہوں نے مزید کہا کہ اسلامی تہذیب نے دنیا کے علمی و سماجی ڈھانچے کو گہرائی سے متاثر کیا ہے، اور اس کی رواداری، انصاف اور علم پر مبنی اقدار آج بھی معاشرتی ہم آہنگی کیلئے مشعلِ راہ ہیں۔
اونٹاریو کے لبرل ارکانِ اسمبلی نے عوام سے اپیل کی کہ وہ اس ماہ کے دوران اسلامی تاریخ، ثقافت اور کردار سے سیکھنے اور سمجھنے کی کوشش کریں تاکہ ایک زیادہ شمولیتی اور متنوع معاشرہ تشکیل دیا جا سکے۔
عدیل شمجی نے آخر میں کہا”آئیں، ہم سب مل کر اسلامی ورثہ ماہ منائیں، اور ایک ایسی دنیا بنائیں جہاں تنوع ہماری پہچان اور اتحاد ہماری طاقت ہو۔”
